Էկվադորցի, ներկայում Պորտուգալիայում ապրող բանաստեղծ Կարլա Բադիլյո Կորոնադոն Հայաստանում է՝ իր «Նռան գույնը» բանաստեղծությունների ժողովածուի հայերեն թարգմանության հատորը ներկայացնելու եւ նոր նախագծեր զարգացնելու նպատակով։
Բանաստեղծի հետ հանդիպումը կայացավ Գյումրու Մարիամ եւ Երանուհի Ասլամազյան քույրերի պատկերասրահում «Ակտուալ արվեստ» մշակութային միության 25-ամյակի միջոցառումների շարքում։
Հեղինակը հնչեցրեց իր երաժշտական ստեղծագործություններից, ընթերցեց բանաստեղծություններ «Նռան գույնը» ժողովածուից՝ հայերեն զուգահեռ թարգմանությամբ։
Գյումրեցի հանդիսատեսը զգաց անմիջական եւ յուրօրինակ բանաստեղծի ասելիքը, հայտնվեց նրա արտասովոր հնչյունների աշխարհում։
Ստեղծագործական իր ընթացքը բանաստեղծը համարում է «մշտապես գործող լաբորատորիա», որը ներառում է փիլիսոփայությունը, կենսաբանությունն ու պատմությունը՝ դրանք մշտապես դիտարկելով խաղային տեսանկյունից։
«Ամեն ինչ սկսվեց տասը տարի առաջ,- ասում է Կարլան,- տեսա Փարաջանովի ֆիլմը Սայաթ-Նովայի մասին, եւ դա իմ կյանքը փոխեց»։
«Նռան գույն»-ից տպավորված՝ պոեմ է գրում։ Ասում է՝ սկսեցի գրել ու գրել, կանգ առնել չկարողացա եւ ֆիլմը գրքի վերածեցի։ Հայաստան գալու բուռն ցանկություն առաջացավ։
Մինչ Կարլան կիրականացներ Փարաջանովի եւ Սայաթ-Նովայի հայրենիքում լինելու երազանքը, Հայաստանում արդեն թարգմանվել էր նրա ժողովածուն։ Իսպանալեզու արձակի եւ չափածոյի թարգմանիչ Ալիս Տեր-Ղեւոնդյանը տեսել ու հաճելիորեն զարմացել էր, որ փարաջանովյան արվեստը ոգեշնչման աղբյուր է նաեւ այլազգի ստեղծագործողի համար։ Սիրով թարգմանել էր «Նռան գույնը» եւ խմբագիր, բանաստեղծ Տիգրան Պասկեւիչյանի հետ կազմակերպել Կարլայի Հայաստան գալը։
«Գրքի երեւանյան շնորհանդեսից առաջ կազմակերպեցինք այս համերգ-հանդիպումը Գյումրիում։ Ես սիրում եմ Գյումրին եւ ցանկություն ունեցա, որ կարեւոր բաները նաեւ այստեղ լինեն»,- ասում է Տիգրան Պասկեւիչյանը։
Կարլան արդեն հասցրել է լինել Հայաստանի որոշ տեսարժան վայրերում, այցելել է Փարաջանովի գերեզմանին։ Մեծ ցանկություն ունի լինելու նաեւ Հաղպատի վանական համալիրում, որտեղ նկարահանվել է Սերգեյ Փարաջանովի ֆիլմը։
«Նռան գույնը» ժողովածուն 2016 թվականին «Loewe» հիմնադրամի «Երիտասարդ ստեղծագործողներ» անվանակարգում 800 ստեղծագործություններից առաջին պատվավոր տեղն է գրավել։ Կարլան պատմում է, որ մրցանակաբաշխության ժամանակ իր ելույթում հնչեցրել է Հայոց ցեղասպանության ճանաչման պահանջը։
Բանաստեղծը հայրենիք վերադառնալուն պես Հայաստանում տեսածն ու լսածը, զգացածն ու ապրածը թղթին կհանձնի, վստահ է՝ յուրօրինակ ու հաճելի տպավորություններով հագեցած ժողովածու է լինելու։
Մինչ այդ՝ հոկտեմբերի 30-ին, մայրաքաղաքում՝ Սերգեյ Փարաջանովի թանգարանում, տեղի կունենա «Նռան գույնը» ժողովածուի շնորհանդեսը։
Առաջին մասնագիտությամբ բանասեր, երկրորդով՝ հոգեբան, լրագրությունը, սակայն, երրորդը չէ։ Լրագրությունը բոլոր մասնագիտություններից ամենասիրելին է։