ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Ռուսաստանը ԵԱՀԿ Մինսկի խմբի համանախագահների տարածաշրջանային այցերի վերսկսման հնարավորության վերաբերյալ Բաքվից եւ Երեւանից պաշտոնական արձագանք է ակնկալում։ Նա նշել է, որ Ռուսաստանը՝ որպես ԵԱՀԿ Մինսկի խմբի համանախագահ, աջակցում է տվյալ ձեւաչափի աշխատանքի շարունակմանը՝ առաջին հերթին դրա մանդատին համապատասխան, հաշվի առնելով 2020-ից հետո ծագած տարածաշրջանային իրողությունները։
«Մեր դիրքորոշոմանն ամբողջությամբ համամիտ են Մինսկի խմբի գործընկերները՝ ԱՄՆ-ը եւ Ֆրանսիան, դա արտացոլվել է ԵԱՀԿ ՄԽ համանախագահ երկրների արտաքին քաղաքական գերատեսչությունների ղեկավարների` 2021-ի դեկտեմբերի 7-ի համատեղ հայտարարությունում»,- ասել է Զախարովան։
Ըստ դիվանագետի՝ այդ փաստաթղթում արձանագրվել է Բաքվին եւ Երեւանին ուղղված կոչը՝ ամենամոտ ժամանակում համանախագահներին ընդունել տարածաշրջանում, ինչը թույլ կտա գնահատել իրավիճակը անմիջապես տեղում, շոշափելի առաջընթացի հասնել մարդասիրական նախաձեռնությունների իրականացման գործում, որոնք քննարկվել են համանախագահների եւ Հայաստանի ու Ադրբեջանի արտգործնախարարների միջեւ տեղի ունեցած հանդիպումների ժամանակ:
Զախարովան նշել է, որ 2021-ի սեպտեմբերին եւ նոյեմբերին Նյու Յորքում եւ Փարիզում տեղի ունեցած հիշյալ շփումների արդյունքում համանախագահները 2021-ի դեկտեմբերի 2-ին Ստոկհոլմում ԵԱՀԿ արտգործնախարարների խորհրդի նիստի շրջանակում երկու նախարարներին փոխանցել են հետագա փոխգործակցության օրակարգի վերաբերյալ հավասարակշռված, միանգամայն իրատեսական առաջարկություններ։
Զախարովան՝ Իլհամ Ալիեւի Կիեւ կատարած այցի մասին
Մարիա Զախարովան պատասխանել է Ադրբեջանի նախագահ Իլհամ Ալիեւի՝ Ուկրաինա կատարած այցի եւ Ուկրաինայի նախագահ Վլադիմիր Զելենսկու հետ հանդիպումից հետո արված մի շարք հայտարարությունների մասին հարցին։ Զախարովան մասնավորապես նշել է, որ Ռուսաստանը երկկողմ հարաբերությունների կառուցումը համարում է յուրաքանչյուր պետության ինքնիշխան իրավունքը, սակայն կարեւոր է, որ այդ կապերն ու շփումներն ուղղված չլինեն երրորդ երկրների դեմ։
«Այդ սկզբունքային դիրքորոշումն ենք հաշվի առնում նաեւ այլ երկրների հետ մեր շփումների կառուցման հարցում: Նման մոտեցում ենք ակնկալում մեր գործընկերներից»,- ասել է ՌԴ ԱԳՆ պաշտոնական ներկայացուցիչը:
Զախարովան հավելել է, որ Ադրբեջանի նախագահի այցը Կիեւ մանրամասն քննարկվել է Ռուսաստանի ու Ադրբեջանի նախագահների հեռախոսազրույցի ընթացքում:
Ուկրաինայի եւ Ադրբեջանի նախագահները Կիեւում քննարկել են Ժողովրդավարության եւ տնտեսական զարգացման կազմակերպության (ՎՈՒԱՄ) երկրները միավորող տրանսպորտային միջանցք ստեղծելու հեռանկարները։
ՎՈՒԱՄ-ի անդամ երկրներն են Վրաստանը, Ուկրաինան, Ադրբեջանը եւ Մոլդովան: