ՀՀ արտգործնախարար Արարատ Միրզոյանն ԱԺ–ում Կառավարության հետ հարցուպատասխանի ժամանակ հաստատել է ադրբեջանական կողմի հայտարարությունը, ըստ որի՝ Միրզոյան-Բայրամովի ժնեւյան հանդիպումից հետո Ադրբեջանը Հայաստանին է փոխանցել խաղաղության պայմանագիր ստորագրելու համար անհրաժեշտ առաջարկներ։
«Իսկապես մեզ փոխանցել են նման փաստաթուղթ։ Ադրբեջանի` մարտի սկզբին մեզ փոխանցած 5 սկզբունքները հրապարակվել են, եւ ֆիքսել ենք, որ մեզ համար անընդունելի ոչինչ չկա։ Այս անգամ ադրբեջանական կողմի փոխանցած առաջարկները, ըստ էության, կառուցված են այդ սկզբունքների վրա։ Կան բաներ, որոնք դեռ վերլուծում ենք եւ կարձագանքենք։ Կլինեն բաներ, որ ընդունելի չեն լինի մեզ համար, եւ հակառակը»,– ասաց Միրզոյանը։
Ըստ նրա` հայկական կողմը նույնպես իր առաջարկները կներկայացնի, այսինքն` նորմալ բանակցային գործընթաց է։
Երեւանն ու Բաքուն քննարկում են միջազգային մոնիթորինգային մեխանիզմի տեղակայման տարբերակը
ՀՀ արտգործնախարարը հայտարարել է նաեւ, որ Հայաստան-Ադրբեջան սահմանին միջազգային մոնիթորինգային մեխանիզմի տեղակայման տարբերակը քննարկվում է բանակցությունների ընթացքում թե՛ միջազգային գործընկերների, թե՛ Ադրբեջանի հետ։
«Կա ընդհանուր ընկալում, այդ թվում` միջազգային դերակատարների շրջանում, որ միայն ագրեսիայի հետեւանքների վերացումը, ադրբեջանական զորքերի դուրսբերումը ՀՀ ինքնիշխան տարածքից, խաղաղության պայմանագրի կնքումը դեռեւս բավարար երաշխիքներ չեն ստեղծի, եւ հավելյալ երաշխքներ կպահանջվեն, օրինակ` Հայաստան–Ադրբեջան սահմանին որեւէ միջազգային մոնիթորինգային, դիտորդական կամ այլ միջազգային մեխանիզմի առկայություն»,– ասաց նախարար Միրզոյանը։
Միրզոյանը նշել է, որ քննարկվում է նաեւ Հայաստան–Ադրբեջան սահմանից զինված ուժերի հետքաշման տարբերակը։
5 կետերի մեջ անընդունելի ոչինչ չկա, բայց դրանք չեն արտացոլում ամբողջական օրակարգը
Արարատ Միրզոյանը հավելել է, որ հիմա կա տեսակետ Բաքու-Ստեփանակերտ երկխոսության խողովակ, երկխոսության միջազգային մեխանիզմ ստեղծելու առնչությամբ։
«Խաղաղության պայմանագիր կնքելու համար ադրբեջանական կողմից մեզ ներկայացված 5 կետերի մեջ անընդունելի ոչինչ չկա, բայց դրանք չեն արտացոլում ամբողջական օրակարգը: Մենք կիսվել ենք մեր պատկերացումներով, որոնց հիմնական մասը հենց Լեռնային Ղարաբաղին է վերաբերել, հիմա էլ բանակցությունների մաս է այս հարցի հասցեագրումը»,– ասաց Միրզոյանը։
Ըստ Միրզոյանի` քննարկումներ են ընթանում ԼՂ-Ադրբեջան երկխոսության խողովակ ստեղծելու մասին։
«Անշուշտ, Հայաստանն ունի մի դիրքորոշում, Ադրբեջանը` մեկ այլ։ Ուստի, երբ երկու կողմերը կհանգեն փոխադարձ ընդունելի դիրքորոշման կամ մեխանիզմի, կտեղեկացնենք այդ մասին»,– վստահեցրել է նախարարը։