Գերմանիայում Եվրախորհրդարանի ընտրություններում մեծ տարբերությամբ հաղթել է Քրիստոնեա-դեմոկրատական միության (ՔԴՄ) եւ Քրիստոնեա-սոցիալիստական միության (ՔՍՄ) պահպանողական դաշինքը։ ARD եւ ZDF հեռուստաալիքների հրապարակած նախնական հաշվարկների համաձայն՝ ՔԴՄ-ն ստացել է ձայների 23,6 տոկոսը, ՔՍՄ-ը՝ 6,6 տոկոսը։
Ընդ որում, Քրիստոնեա-դեմոկրատական միությունը զբաղեցրել է առաջին տեղը բոլոր կուսակցությունների շարքում, իսկ պահպանողական դաշինքը ընդհանուր առմամբ հաղթել է զգալի տարբերությամբ։
Երկրորդ տեղում, ինչպես եւ սպասվում էր, աջ պոպուլիստական «Այլընտրանք Գերմանիայի համար» կուսակցությունն է՝ հավաքելով ձայների 16,2 տոկոսը։ ՔԴՄ/ՔՍՄ դաշինքից մեծ տարբերությամբ երրորդ տեղում է «Գերմանիայի սոցիալ-դեմոկրատական կուսակցությունը», որին հաջորդում է «90-ականների միություն/Կանաչների կուսակցությունը»՝ ձայների 11,9 տոկոսով։ Կոալիցիոն կառավարության երրորդ կուսակցությունը՝ «Ազատ ժողովրդավարական կուսակցությունը», ստացել է ձայների 5 տոկոսը։
Ընտրությունների համար կանխատեսելի նորույթ էր նոր ձախակողմյան «Սարա Վեգենհեխթի միության» հավաք ած համեմատաբար բարձր արդյունքը, որը խլեց «Ձախ կուսակցության» ձայները եւ հավաքեց ավելի քան 5 տոկոս։ Մինչդեռ «Ձախ կուսակցությունը» ընդհանուր առմամբ հավաքել է 2,7 տոկոս։
Դիտորդները ընտրությունների արդյունքները գնահատում են որպես դժգոհության արտահայտություն Գերմանիայի կառավարական կոալիցիայի կուսակցությունների նկատմամբ, որոնք ընդհանուր առմամբ ավելի քիչ ձայն են հավաքել, քան ՔԴՄ/ՔՍՄ ընդդիմադիր դաշինքը։
Կանցլեր Օլաֆ Շոլցի կուսակցությունը՝ «Գերմանիայի սոցիալ-դեմոկրատական կուսակցությունը» երկրի համընդհանուր ընտրություններում ցույց է տվել Գերմանիայի Դաշնային Հանրապետության գոյության ողջ ժամանակահատվածի վատագույն արդյունքը։ Ենթադրվում է, որ Եվրախորհրդարանի ընտրարշավի հիմնական պարտվողը «90-ականների միություն/Կանաչների կուսակցությունն» էր: Վերջին ընտրություններում նա հավաքել է ձայների 20,5 տոկոսը։ Այժմ նրա արդյունքը ավելի քան մեկ երրորդով ավելի վատ էր:
Ընդհանուր առմամբ, կառավարական կոալիցիոն կուսակցությունները կորցրել են իրենց ընտրողների ավելի քան մեկ քառորդը:
«Այլընտրանք Գերմանիայի համար» կուսակցության արդյունքն ավելի ցածր էր, քան երկու ամիս առաջ արված կանխատեսումներն էին ցույց տալիս։ Այս ամենին զուգահեռ, աջ պոպուլիստները շարունակում են ընտրական առավելություն ստանալ՝ օգտվելով կառավարական կոալիցիայի քաղաքականությունից ընտրողների դժգոհությունից։
Ըստ առաջին կանխատեսումների՝ ընտրություններին քաղաքացիների մասնակցությունը կազմել է շուրջ 64-66 տոկոս։