Վրաստանի խորհրդարանը ընդունել է «օտարերկրյա գործակալների» գրանցման մասին նոր օրենք, որն այս անգամ մոտ է ԱՄՆ-ում գործող տարբերակին (Foreign Agents Registration Act, FARA)։ Այդ մասին հայտնում է «Ազատություն» ռադիոկայանի վրացական ծառայությունը:
Փաստաթղթի հեղինակներից մեկը՝ խորհրդարանի իրավական հարցերի հանձնաժողովի ղեկավար Արչիլ Գորդուլաձեն, հայտարարել է, որ «օտարերկրյա գործակալների» մասին նոր օրենքը նախատեսում է քրեական հետապնդում այն իրավաբանական եւ ֆիզիկական անձանց նկատմամբ, ովքեր ստանում են օտարերկրյա ֆինանսավորում եւ խուսափում են Վրաստանի Հանրապետության արդարադատության նախարարության ռեեստրում գրանցվելուց:
Ընդդիմությունն ու քաղաքացիական հասարակության ներկայացուցիչները քննադատել են նախաձեռնությունը՝ նշելով, որ այն ուղղված է անկախ քաղաքացիական կազմակերպությունների եւ լրատվամիջոցների դեմ, գրում է «Ազատություն» ռադիոն:
Վրաստանի խորհրդարանը նաեւ կողմ է քվեարկել «հայրենիքի դավաճանության» մասին հոդվածը երկրի Քրեական օրենսգիրք վերադարձնելու առաջարկին։ Այն վերացվել է 2007 թվականին Միխեիլ Սաակաշվիլիի օրոք։
Ընդդիմությունը կարծում է, որ «հայրենիքի դավաճանություն» հոդվածի վերադարձը անհրաժեշտ է Վրաստանի իշխանություններին նախկին իշխող «Միասնական ազգային շարժում» կուսակցության եւ նրա առաջնորդ Սաակաշվիլիի դեմ դատավարության համար:
Բացի այդ՝ խորհրդարանականները հավանություն են տվել այլ օրենքների եւ փոփոխությունների, որոնք սահմանափակում են լրատվամիջոցների եւ հասարակական կազմակերպությունների գործունեությունը: