Հռոմի պապ Ֆրանցիսկոսի մարտի 28-ի որոշման համաձայն՝ կսրբադասվի 1915-ի Հայոց ցեղասպանության ժամանակ նահատակված Երանելի Իգնատիոս Շուքրալահ Մալոյանը, որը Մարդին քաղաքի Հայ Կաթողիկե եկեղեցու առաջնորդն էր։ Այդ մասին հայտնում է Vatican News-ը։
Նրա հետ միասին կսրբադասվեն նաեւ նախորդ դարում Պապուա Նոր Գվինեայում ապրած եւ նահատակված աշխարհական Պիետրո Տո-Ռոեն, «Suore Ancelle di Gesù» միաբանության հիմնադրուհի Մարիա Դը Մոնթե Կարմելոն։ Երանելի կհռչակվի նաեւ Հայր Կարմելո Դը Պալման, իսկ Աստծո Ծառայի տիտղոս կշնորհվի բրազիլացի Ջուզեպե Անտոնիո Մարիա Իպիապինային։
Շուքրալահ Մալոյանը ծնվել է 1869 թվականին Մարդին քաղաքում՝ ներկայիս Թուրքիայի հարավում։ 1883-ին ընդունվել է Զմմառի վանքի Հայ Կաթողիկէ Պատրիարքական հոգեւորական միաբանություն։ 1896-ին ձեռնադրվել է քահանա եւ ընդունել Իգնատիոս անունը եւ ուղարկվել Ալեքսանդրիա, որտեղ հայտնի է դարձել իր քարոզներով, որոնք կարդացել էր թե՛ արաբերեն եւ թե՛ թուրքերեն։ Ավելի ուշ նշանակվել է Կահիրեի Պատրիարքական փոխանորդ, բայց մեկ տարի անց տեսողության խնդիրների պատճառով վերադարձել է կրկին Ալեքսանդրիա։ Պողոս Պետրոս 12-րդ Սապպաղյան Կաթողիկոս — Պատրիարքը Մալոյանին հետագայում հրավիրում է Ստամբուլ որպես իր անձնական քարտուղար, սակայն 1904-ին նա դարձյալ վերադառնում է Ալեքսանդրիա՝ շարունակելու տեսողության հետ կապված բուժումներն ու առաքելությունը։
Վեց տարի անց նշանակվել է Մարդինի Պատրիարքական փոխանորդ եւ 1911-ին Հռոմում մասնակցել է Հայ Կաթողիկե Եպիսկոպոսների սինոդին, որը տեղի էր ունեցել Լեւոնյան Քահանայապետական վարժարանում։ Նիստի ընթացքում հոգեւորականը ներկայացրել էր Օսմանյան կայսրության ներսում հայերի շուրջը ստեղծված ծանր իրադրությունը։
600 հավատացյալների եւ 13 քահանաների հետ օսմանյան իշխանությունների հրամանով Մալոյանը ձերբակալվել էր 1915 թվականի հունիսի 3-ին։ Մերժելով հավատափոխության պահանջը՝ հոգեւորականը սպանվել էր հունիսի 11-ին։
Իգնատիոս Մալոյանը երանելի հռչակվել էր Սուրբ Հովհաննես Պողոս 2-րդ պապի օրոք՝ 2001 թվականի հոկտեմբերի 7-ին։