ԱՄՆ պետքարտուղարն ու նախագահի ազգային անվտանգության հարցերով ժամանակավոր խորհրդական Մարկո Ռուբիոն հայտարարել է, որ Իրանը պետք է թույլ տա միջազգային տեսուչներին ստուգել իր բոլոր միջուկային օբյեկտները, ներառյալ ռազմականները։ Այս մասին նա ասել է Fox News հեռուստաալիքին տված հարցազրույցում՝ մեկնաբանելով Իրանի միջուկային ծրագրի վերաբերյալ նոր հնարավոր համաձայնագրի պայմանները։
«Եթե Իրանը իրոք ցանկանում է խաղաղ միջուկային էներգիա եւ ոչ թե զենք, ապա չպետք է վախենա ստուգումներից՝ այդ թվում ամերիկացի տեսուչների մասնակցությամբ։ Խաղաղ միջուկային ծրագիր ունեցող երկրները չեն հարստացնում ուրանը եւ չեն թաքցնում օբյեկտները», — հայտարարել է Ռուբիոն։
Նա «սխալ» է համարել 2015 թվականի համաձայնագիրը, որը սահմանափակում էր ռազմական օբյեկտներ տեսուչների մուտքը, եւ առաջարկել է մոդել, ըստ որի Իրանը կարող է հարստացված ուրանը արտահանել ատոմային էլեկտրակայանների աշխատանքի համար։
Պետքարտուղարը նշել է, որ Վաշինգտոնը պատրաստ է Թեհրանին «խաղաղության ուղի» առաջարկել։ «Տնտեսական զարգացում՝ ահաբեկչությանը աջակցելուց, հեռահար հրթիռներ մշակելուց եւ ուրանը հարստացնելուց հրաժարվելու դիմաց»,-նշել է Ռուբիոն։
«Նախագահ Թրամփը չի ցանկանում պատերազմ, սակայն մենք չենք կարող թույլ տալ, որ Իրանն ունենա միջուկային զենք», — եզրափակել է պետքարտուղարը։
Միացյալ Նահանգները եւ Իրանը Օմանի միջնորդությամբ բանակցությունների առաջին փուլը անցկացրել էին ապրիլի 12-ին Մասքատում։ Երկրորդը տեղի ունեցավ ապրիլի 19-ին՝ Հռոմում, իսկ երրորդը՝ ապրիլի 26-ին, կրկին Մասքատում։ Բանակցություններին Իրանի պատվիրակությունը գլխավորում է Իսլամական Հանրապետության արտաքին գործերի նախարար Աբբաս Արաղչին, իսկ ամերիկյան պատվիրակությունը՝ նախագահի հատուկ բանագնաց Սթիվեն Ուիթքոֆը։
Հինգշաբթի օրը Օմանի արտաքին գործերի նախարար Բադր ալ-Բուսաիդին հայտարարեց, որ մայիսի 3-ին նախատեսված ԱՄՆ-Իրան բանակցությունների հաջորդ փուլը հետաձգվել է «լոգիստիկ պատճառներով»։ Նրա հայտարարությունը հաջորդեց Axios-ի հրապարակումը, որում ենթադրվում էր, որ հանդիպումը կարող է հետաձգվել։ Այնուհետեւ Ֆրանսիայի արտաքին գործերի նախարար Ժան-Նոել Բարոն AFP-ին տված հարցազրույցում հայտարարել էր, որ Իրանի խորհրդակցությունները նախատեսված «եվրոպական եռյակի»՝ Մեծ Բրիտանիայի, Գերմանիայի եւ Ֆրանսիայի հետ նույնպես չեն կայանա։