Դամասկոսի դրուզներով բնակեցված արվարձաններում՝ Ջարամանայում եւ Սահնայում, երկօրյա բախումներից հետո մայիսի 1-ից հրադադար է հայտարարվել։ Այս մասին հայտնել է Ալ-Սուվեյդա նահանգի նահանգապետ Մուստաֆա ալ-Բաքուրը՝ երկրի նոր իշխանությունների պատվիրակության եւ դրուզական համայնքի ավագների միջեւ Դամասկոսի մոտակայքում կայացած հանդիպումից հետո, հաղորդում է «Syria TV» հեռուստաալիքը։
«Համաձայնություն է ձեռք բերվել Սիրիայի անվտանգության ուժերի պարեկային կայանների վրա հարձակումներ կատարած հանցագործների իրավապահ մարմիններին արտահանձնման վերաբերյալ, որի արդյունքում զոհվել է մոտ 20 աշխատակից», — նշել է նահանգապետը։
Նահանգապետի խոսքով՝ հանդիպման մասնակիցները նաեւ դատապարտել են Դամասկոսի հարավում տեղի ունեցող իրադարձություններին Իսրայելի միջամտությունը, որը «ուղղված է եղել քաղաքացիական բախումներ հրահրելուն»։
Նախորդ շաբաթ Իսրայելի ռազմաօդային ուժերի անօդաչու թռչող սարքերը հարվածներ էին հասցրել Սիրիայի նոր իշխանությունների կողմից վերահսկվող անվտանգության ուժերի հենակետերին, որոնք տեղակայվել էին Դամասկոսի հարավարեւմտյան արվարձաններում կարգուկանոնի վերականգնման գործողությունների շրջանակներում։
Իր հերթին, Իսրայելի պաշտպանության բանակը հայտարարել է, որ վարչապետ Բենիամին Նեթանյահուի եւ պաշտպանության նախարար Իսրայել Կացի հրամանով «կանխարգելիչ հարվածներ են հասցվել Սիրիայի զինված արմատականների դիրքերին», որոնք հարձակում էին նախապատրաստում դրուզ աշխարհազորայինների դեմ։ Նեթանյահուի գրասենյակից հայտարարել են, որ Դամասկոսին «խիստ նախազգուշացում» է ուղարկվել տեղի դրուզ համայնքի դեմ բռնությունը դադարենելու վերաբերյալ։ Հայտարարության մեջ ընդգծվում է, որ Իսրայելը «հանձնառու է դրուզների պաշտպանությանը եւ չի հանդուրժի նրանց դեմ հարձակումները Սիրիայում»։
Դրուզները արաբախոս առանձին էթնո-կոնֆեսիոնալ խումբ են, որի ներկայացուցիչները բնակվում են Սիրիայում, Լիբանանում, Իսրայելում եւ Հորդանանում։ Սիրիայում բնակվում է 700,000 դրուզ, ինչը նրանց դարձնում է երրորդ ամենամեծ կրոնական եւ էթնիկ փոքրամասնությունը քրդերից եւ ալավիներից հետո։