Եվրոպական Միությունը Ռուսաստանի դեմ նոր պատժամիջոցների փաթեթ է պատրաստում, որը նախատեսվում է համաձայնեցնել ԱՄՆ-ի հետ։ Այս պատժամիջոցները ուժի մեջ կմտնեն այն պարագայում, եթե Մոսկվան շարունակի հրաժարվել Ուկրաինայում հրադադարի հաստատելու առաջարկներից, AFP գործակալության հետ զրույցի ընթացքում հայտնել է Ֆրանսիայի արտգործնախարար Ժան-Նուել Բարրոնը։
«Մենք՝ եվրոպացիներս, աջակցում ենք ամերիկյան այս նախաձեռնությանը՝ տասնյոթերորդ պատժամիջոցային փաթեթով, եւ ես երեկ խոստացա [ամերիկացի սենատոր] Լինդսի Գրեհեմին, որ կփորձենք համաձայնեցնել այս երկու փաթեթները՝ ինչպես բովանդակության, այնպես էլ ժամկետների առումով», — ասել է Բարրոն։
Նոր պատժամիջոցների փաթեթի հնարավոր բովանդակության վերաբերյալ մանրամասներ դեռեւս չեն հաղորդվում։
Նախօրեին հանրապետական սենատոր Լինդսի Գրեհեմը հայտարարեց, որ իր 72 գործընկերներն աջակցել են Ռուսաստանի դեմ «կործանիչ» պատժամիջոցների կիրառման վերաբերյալ օրինագծին, որոնք ուժի մեջ կմտնեն, եթե Մոսկվան հրաժարվի խաղաղության բանակցություններից։
Ֆրանսիայի ԱԳ նախարարը Ռուսաստանի նախագահ Վլադիմիր Պուտինին անվանել է Ուկրաինայում խաղաղության հասնելու ճանապարհի «միակ խոչընդոտը»՝ ընդգծելով, որ Կիեւն «իր բաժին պայմանավորվածությունները կատարել է»։
Բարրոն, ով մինչ այդ Վաշինգտոնում հանդիպել էր ԱՄՆ պետքարտուղար Մարկո Ռուբիոյի հետ, պատմել է, որ վերջինիս հետ «բաց» զրույց է ունեցել, որի ընթացքում հաստատվել է եվրոպացիների եւ ամերիկացիների նպատակների «նմանությունը»։
«Մեզ մոտ տեղի ունեցավ բաց մտքերի փոխանակում, որը մեզ հնարավորություն տվեց սերտորեն համադրել մեր քայլերը, ինչպես նաեւ հաստատել մեր նպատակների համընկնումը տարածաշրջանային եւ միջազգային ճգնաժամերի հարցում, քանի որ ցանկանում ենք գործել միասին», — հավելել է նա։