Կիեւի եւ Մոսկվայի միջեւ խաղաղության համաձայնագրի համար տարվող բանակցությունների վերաբերյալ ԱՄՆ մոտեցման փոփոխության պատճառով Վաշինգտոնի ներկայացուցիչը այլեւս չի պատրաստվում «թռնել աշխարհով մեկ»՝ որպես միջնորդ հանդես գալու համար։ Այս մասին հայտարարել է Պետդեպարտամենտի խոսնակ Թեմի Բրյուսը։
Բրյուսի խոսքով՝ ԱՄՆ պետքարտուղար Մարկո Ռուբիոն «հստակ ընդգծել է», որ «ԱՄՆ-ի մասնակցության մեթոդաբանությունը» փոխվում է՝ այն առումով, որ Վաշինգտոնը այլեւս չի շարունկաի միջնորդական ջանքերը։
«Մենք, անշուշտ, շարունակում ենք հավատարիմ մնալ այս գործընթացին եւ կօգնենք ու կանենք հնարավոր ամեն բան։ Բայց մենք այլեւս չենք պատրաստվում աշխարհով մեկ թռչել ամեն հրավերի դեպքում՝ հանդիպումներին միջնորդելու համար», — ասել է նա՝ պատասխանելով հարցին, թե արդյո՞ք Դոնալդ Թրամփը դիտարկում է Ռուսաստանի նկատմամբ երկրորդային պատժամիջոցների կիրառումը։
Բրյուսի խոսքով՝ եկել է այն պահը, երբ երկու կողմերն էլ «պետք է ներկայացնեն եւ մշակեն հստակ գաղափարներ այն մասին, թե ինչպես պետք է ավարտվի այս հակամարտությունը»։ Նա նաեւ հավելել է, որ ԱՄՆ-ը «ակնհայտորեն չի պատրաստվում վերացնել որեւէ գործող պատժամիջոց, որոնք այժմ կիրառվում են Ռուսաստանի նկատմամբ»։
ԱՄՆ պետքարտուղար Մարկո Ռուբիոն Fox News-ին տված հարցազրույցում նշել էր, որ Ռուսաստանի եւ Ուկրաինայի դիրքորոշումները «դեռեւս մի փոքր հեռու են միմյանցից»։ Նրա խոսքով՝ «Պուտինը չի կարող գրավել ողջ Ուկրաինան, իսկ Ուկրաինան չի կարող հետ մղել Ռուսաստանին այն սահմանները, որտեղ այն գտնվել է մինչեւ 2014 թվականը»։
Ինչպես նշել է Ռուբիոն, ԱՄՆ-ը չի պատրաստվում հրաժարվել խաղաղության շուրջ համաձայնության հասնելու փորձերից եւ պատրաստ է օգնել, սակայն, ինչ որ մի պահի նախագահ Թրամփը «պետք է որոշի, թե որքան ժամանակ է նա դեռ պատրաստ տրամադրել այս հարցին», քանի որ աշխարհում կան բազմաթիվ «ավելի կարեւոր խնդիրներ»։
«Չեմ ասում, թե Ուկրաինայում տեղի ունեցող պատերազմը կարեւոր չէ, բայց կասեի, որ այն, ինչ տեղի է ունենում Չինաստանի հետ, երկարաժամկետ հեռանկարում ավելի կարեւոր է աշխարհի ապագայի համար», — հավելել է պետքարտուղարը։