Եվրոպայում եւ Աֆրիկայում քրդական շարժման ազգային առաջնորդ Աբդուլահ Օջալանին ազատելու պահանջով արշավներ են մեկնարկել, Իտալիայում ստորագրահավաքներ են ընթանում. տարիներ առաջ Նեապոլի քաղաքապետարանը Օջալանին պատվավոր քաղաքացու կոչում էր շնորհել:
«22 տարի է անցել այն պահից, ինչ քրդերի ազգային առաջնորդ Աբդուլահ Օջալանին Քենիայում ձերբակալեցին, այնուհետեւ տեղափոխեցին Թուրքիա՝ դատավարություն սկսելու համար: Արդեն 22 տարի նա ապրում է ծանրագույն պայմաններում: Վերջին 5 տարում ընտանիքի անդամներին արգելվել է տեսակցել նրա հետ»,- գրել է իտալացի լրագրող Բենեդետտա Օրգինտիրին:
Սկիզբ առած արշավի մասին նա ասում է հետեւյալը. «Ըստ իս, Իտալիայում սկսված «The moment is now» («Պահը հիմա է») արշավն անչափ կարեւոր է, որովհետեւ եկել է նրա ազատագրման ժամանակը»:
«Բանտում անցկացված բոլոր 22 տարիների ընթացքում Աբդուլահ Օջալանը ոչ մի վատ արարք չի գործել, սոսկ ազատություն է պահանջել, շրջակա միջավայրի պահպանության եւ կանանց հեղափոխության կոչ արել:
Դրանք բոլորն էլ կարեւոր արժեքներ են, եւ այդ արժեքներից Թուրքիան սարսափում է: Անհրաժեշտ է, որ մարդիկ հանուն սեփական ապագայի ընկալեն իրականությունը»,- նշել է լրագրողը:
Բենեդետտա Օրգինտիրին տարակուսում է, որ Քրդական բանվորական կուսակցությունը (ՔԲԿ) մինչեւ օրս ահաբեկչական կառույցների ցանկում է, այնինչ Ստրասբուրգում դատարանի վճիռ կա, որի համաձայն այն ահաբեկչական կազմակերպություն չէ, այլ Թուրքիայում շարունակվող քաղաքացիական պայքարի մարտիկ:
Լրագրողն ընդգծում է, որ Եվրոպան Թուրքիայի հետ բազմատեսակ, նաեւ՝ տնտեսական ու աշխարհաքաղաքական հարաբերություներ ունի, եւ այդ հարաբերությունները կխզվեն, եթե Թուրքիայի դեմ ինչ-որ քայլեր ձեռնարկվեին:
«Անշուշտ, Աբդուլահ Օջալանի ճակատագիրը խիստ կարեւոր հարց է, սակայն մենք տեսնում ենք խորհրդարանի ձերբակալված անդամների նկատմամբ Թուրքիայի հալածիչ քաղաքականությունը:
Քուրդ բնակիչների մեջ կան նաեւ մտավորականներ, լրագրողներ եւ քաղաքացիներ, որոնց ցանկացած պահին կարող են բանտ նետել: Դրանք իսկական բռնություններ են: Տեղից վեր կացողը խոսում է Թուրքիայի քաղաքական ռեժիմից: Ով ասես՝ խոսում է, բայց ոչ մեկը տեղից չի շարժվում»,- եզրափակում է Բենեդետտա Օրգինտիրին: