ՀՀ առողջապահության նախարարությունը հայտարարել է, որ Հայաստանում կորոնավիրուսային հիվանդության դեմ պատվաստումների ցուցանիշը հատել է 50 հազարի շեմը: Հունիսի 8-ի դրությամբ Հայաստանում կատարվել է 50 հազար 228 պատվաստում։
Հայաստանում AstraZeneca-ով եւ Coronavac-ով կարող են պատվաստվել 18 եւ բարձր տարիքի քաղաքացիները, կամավորության սկզբունքով: Իսկ Sputnik-V-ով պատվաստումները նախատեսված են 18 տարեկանից բարձր քրոնիկ հիվանդների, 18-54 տարեկան բուժաշխատողների, սոցիալական խնամքի կենտրոնների բնակիչների եւ աշխատակիցների համար:
Հայաստանում այսօր հաստատվել է կորոնավիրուսային հիվանդության 99 նոր դեպք, առողջացել է 81 քաղաքացի, գրանցվել՝ հիվանդությունից մահվան 11 դեպք։
Ընդհանուր առմամբ հաստատվել է կորոնավիրուսային հիվանդության ընդհանուր 223384 դեպք, որոնցից 214690-ն՝ առողջացման, 4474-ը՝ մահվան ելքով, եւս 1091 վարակակիր մահացել է այլ պատճառներով: Կորոնավիրուսային հիվանդությունից այս պահին փաստացի բուժում է ստանում 3129 մարդ:
Մեկ օրում կատարվել է 3530 թեստավորում: Թեստավորման ընդհանուր թիվն այսպիսով հասել է 1111596-ի: