Ադրբեջանի նախագահ Իլհամ Ալիեւը հայտարարել է, թե Ադրբեջանի բանակը Հայաստանի տարածք մուտք չի գործել։
Ըստ «Ազատություն» ռադիոկայանի՝ Ադրբեջանի նախագահը պնդել է, որ համաձայն չէ ԵՄ խորհրդի ղեկավար Շառլ Միշելի հետ, որն իր տարածաշրջանային այցի ընթացքում լարվածության կիզակետում հայտնված սահմանային տարածքներին «վիճելի» որակումն էր տվել։
«Ես փորձեցի նրան բացատրել, որ մենք դուրս ենք եկել մեր սահմաններ։ Ինչո՞ւ ենք դա արել միայն մայիսին, որովհետեւ ձնհալը միայն այդ ժամանակ էր ավարտվել, եւ դրանից հետո մենք վերցրել ենք անհրաժեշտ բարձունքները եւ տեղակայվել, ամրապնդվել այնտեղ։ Այդ ամրապնդումը շարունակվելու է»,- հայտարարել է Ալիեւը։
Ալիեւը պնդել է, որ «Լեռնային Ղարաբաղ» տարածքային միավոր «այլեւս գոյություն չունի, եւ դրա կարգավիճակի հարցը քննարկման ենթակա չէ»։
«Այս պահին Ղարաբաղում 25 հազար հայ է մնացել։ Ի՞նչ տրամաբանությամբ մենք պետք է 25 հազար հոգուն կարգավիճակ շնորհենք», — հայտարարել է Ադրբեջանի նախագահը։
Հաղորդակցության ուղիների վերաբացման մասին խոսելիս Ալիեւը դարձյալ օգտագործել է «Զանգեզուրի միջանցք» բառակապակցությունը՝ պնդելով, թե դրա ստեղծմանը կողմ է նաեւ Ռուսաստանը։
«Ես Ռուսաստանի նախագահի հետ քննարկել եմ հետպատերազմյան իրավիճակը, այդ թվում՝ «Զանգեզուրի միջանցքին» վերաբերող հարցերը։ Մեր մոտեցումներում տարաձայնություններ չկան. պատերազմն ու հակամարտությունն ավարտվել են։ Ինչ վերաբերում է «Զանգեզուրի միջանցքին», ես տեղեկացրել եմ պարոն Պուտինին, որ Հայաստանն այս հարցում անկեղծ չէ։ Մենք տեսնում ենք, որ Հայաստանն այս խնդրի շուրջ փորձում է ինչ-որ խաղ տանել»,- հայտարարել է Ալիեւը։