ՀՀ ՊՆ պաշտպանական քաղաքականության եւ միջազգային համագործակցության գլխավոր վարչության պետ Լեւոն Այվազյանը ՊՆ վարչական համալիրում հուլիսի 28-ին ընդունել է Հայաստանում հավատարմագրված օտարերկրյա դեսպանությունների ռազմական կցորդներին:
Հանդիպման ընթացքում ռազմական կցորդներին տեղեկություն է ներկայացվել հուլիսի 28-ի վաղ առավոտից Ադրբեջանի ԶՈՒ-ի կողմից հայ-ադրբեջանական սահմանի Վերին Շորժայի ուղղությամբ իրականացված մարտական գործողությունների վերաբերյալ:
Ընդգծվել է, որ դիրքերը բարելավելու եւ հետագա հնարավոր առաջխաղացման համար բարենպաստ պայմաններ ստեղծելու նպատակով ադրբեջանական ստորաբաժանումները ականանետների, նռնականետների եւ խոշոր տրամաչափի հրազենի կիրառմամբ հարձակվել են հայկական գերիշխող հենակետի վրա եւ ժամանակավորապես գրավել այն: ՀՀ ԶՈՒ-ի ստորաբաժանումների պատասխան գործողությունների արդյունքում, կրելով բազմաթիվ կորուստներ, հակառակորդը հետ է շպրտվել ելման դիրքեր:
Այվազյանը ռազմական կցորդների ուշադրությունը հրավիրել է այն փաստի վրա, որ 2020-ի նոյեմբերի 9-ի եռակողմ հայտարարությունից ի վեր հակառակորդի կողմից զենքի կիրառմամբ իրականացված ամենալայնածավալ սադրանքը տեղի է ունեցել ՀՀ ինքնիշխան տարածքում եւ անմիջական վտանգ է ներկայացրել հարակից բնակավայրերի խաղաղ բնակչության համար:
Այվազյանը շեշտել է, որ 2020-ի նոյեմբերի 9-ի հայտարարության դրույթներով ամրագրված պարտավորությունների իրականացմանը հավատարիմ լինելով՝ հայկական կողմի դիրքորոշումը մնում է հստակ եւ անփոփոխ՝ ադրբեջանական զինված ուժերի ստորաբաժանումները պետք է դուրս բերվեն Հայաստանի Հանրապետության ինքնիշխան տարածքից:
Այվազյանը նշել է, որ իրավիճակի սրման եւ հետագա ապակայունացման ամբողջ պատասխանատվությունը կրում է ադրբեջանական կողմը:
Հանդիպման մասնակից ՀՀ Մարդու իրավունքների պաշտպանի տեղակալ Արտյոմ Սեդրակյանը կցորդներին է ներկայացրել ադրբեջանական կողմի իրականացրած սադրանքի հետեւանքով մարդու իրավունքների խախտումների տեսանկյունից ստեղծված իրավիճակը:
ՄԻՊ-ի ներկայացուցիչը հայտնել է, որ համաձայն փաստահավաք տվյալների՝ հրաձգությունները հրահրում են ադրբեջանական զինված ուժերը, դրանք տեղի են ունենում ՀՀ գյուղերի անմիջական հարեւանությամբ, այդ թվում՝ գյուղերի ուղղությամբ: Ստացված փաստերը հաստատում են, որ ադրբեջանական կրակոցներն ամեն անգամ հնարավոր է լինում կանխել միայն ՀՀ զինված ուժերի պատասխան կրակոցների շնորհիվ, որոնք պաշտպանում են մեր բնակիչների իրավունքները, կյանքն ու խաղաղությունը:
Մարդու իրավունքների պաշտպանի աշխատակազմի գնահատմամբ՝ այս պայմաններում ադրբեջանական իշխանությունները կրում են այսօրվա կրակոցներով բնակիչների իրավունքների խախտումների, ՀՀ երեք զինծառայողների սպանությամբ նրանց իրավունքները խախտելու եւ վիրավորվածների առողջությանը հասցված վնասի համար: