Եվրախորհրդարանի Հարավային Կովկասի հետ հարաբերությունների պատվիրակության ղեկավար Մարինա Կալյուրանդը, ԵԽ Հայաստանի հարցով հիմնական զեկուցող Անդրեյ Կովաչեւը եւ ԵԽ Ադրբեջանի հարցով հիմնական զեկուցող Զելյանա Զովկոն համատեղ հայտարարություն են տարածել Հայաստանի եւ Ադրբեջանի սահմանին տեղի ունեցած մահացու բախումների վերաբերյալ:
Զեկուցողները ցավակցել են հուլիսի 28-ին Գեղարքունիքի մարզի սահմանին ադրբեջանական զինուժի հետ բախումների հետեւանքով զոհված երեք հայ զինծառայողների ընտանիքներին:
Վերջին փոխհրաձգությունը ոչ պակաս անհանգստացնող է
«Դժբախտաբար, սա ընդամենը մեկն է վերջին ամիսներին միջադեպերի կամ սադրանքների այն շարքից՝ ներառյալ միջպետական սահմանին տեղի ունեցած բռնությունները, որոնք սկսվեցին ադրբեջանական զորքերի՝ մայիսի 12-ին Հայաստանի տարածք ներխուժելուց հետո:
Վերջին փոխհրաձգությունը, որ տեղի ունեցավ Նախիջեւանի սահմանին, որտեղ մեկ այլ հայ զինվոր սպանվեց, ոչ պակաս անհանգստացնող է»,- նշված է Եվրախորհրդարանի պաշտոնական կայքում տեղադրված հաղորդագրությունում:
Բանակցությունների, ոչ թե ուժի կիրառման միջոցով
ԵԽ պատգամավորները կողմերին հորդորել են խստորեն հետեւել հրադադարին եւ խուսափել ցանկացած սադրանքից:
Նրանք ընդգծել են, որ սահմանի վերաբերյալ ցանկացած հնարավոր տարաձայնություն պետք է լուծվի սահմանագծման եւ սահմանազատման շուրջ բանակցությունների եւ ոչ թե ուժի կիրառման եւ միակողմանի գործողությունների միջոցով:
Բոլոր զորքերը պետք է հետ քաշվեն մինչեւ մայիսի 12-ը զբաղեցրած դիրքերը՝ հրադադարի մասին եռակողմ հայտարարության դրույթներին համապատասխան:
Դադարեցնել սադրիչ հռետորաբանությունը
Եվրախորհրդարանի պատվիրակությունը շեշտել է, որ իրադրության կայունացման եւ լարվածության թուլացման համար ծայրաստիճան կարեւոր է, որ անմիջապես դադարեցվի սադրիչ հռետորաբանությունը:
Այս համատեքստում ԵԽ պատգամավորները դատապարտել են Ադրբեջանի ներկայացուցիչների վերջին հայտարարությունները այսպես կոչված «Արեւմտյան Զանգեզուրի» վերաբերյալ եւ Հայաստանի Հանրապետության տարածքները իբրեւ ադրբեջանցիների «նախնիների հողեր» ներկայացնելը:
ԵԽ պատգամավորներն ընդգծել են, որ նման հայտարարությունները խիստ անպատասխանատու են եւ կարող են էլ ավելի խարխլել տարածաշրջանային անվտանգությունը:
«Հիշեցնում ենք ԵՄ հանձնառությունը՝ աջակցելու վստահություն կառուցող միջոցառումներին եւ բոլոր խնդիրները բանակցությունների սեղանի շուրջը լուծելուն՝ ներառյալ տեւական հակամարտության կարգավորման եւ Լեռնային Ղարաբաղի ապագա կարգավիճակի շուրջ բանակցությունների վերսկսումը»,- շեշտել է ԵԽ Հարավային Կովկասի հետ հարաբերությունների պատվիրակության ներկայացուցիչը: