Ֆրանսիայի արտգործնախարար Ժան-Իվ Լե Դրիանը հոկտեմբերի 5-ին կհանդիպի Միացյալ Նահանգների պետքարտուղար Էնթոնի Բլինքենի հետ: Պետդեպի խոսնակ Նեդ Փրայսն ավելի վաղ հայտնել էր, որ Բլինքենը հոկտեմբերի 4-6-ը Փարիզում կհանդիպի Ֆրանսիայի ղեկավարության հետ:
Ավստրալիայի, Մեծ Բրիտանիայի եւ Միացյալ Նահանգների՝ անվտանգության ոլորտում նոր գործընկերություն AUKUS-ի ստեղծման մասին սեպտեմբերի 15-ին արված համատեղ հայտարարությունից հետո Փարիզը խորհրդատվությունների համար անհապաղ հետ էր կանչել Միացյալ Նահանգներում եւ Ավստրալիայում իր դեսպաններին:
ԱՄՆ-ը եւ Ավստրալիան ափսոսանք էին հայտնել դեսպաններին հետ կանչելու Ֆրանսիայի որոշման կապակցությամբ՝ շեշտելով, որ առաջիկայում կփորձեն լուծել տարաձայնությունը։ Վաշինգտոնից եւ Կանբերայից դեսպաններին հետ կանչելը համարվում է դիվանագիտական աննախադեպ ճգնաժամ։
Համաձայնագրի շրջանակում Ավստրալիան նախատեսում է հարստացնել սեփական զինված ուժերը ամերիկյան թեւավոր հրթիռներով եւ ամերիկյան տեխնոլոգիաների օգնությամբ առնվազն 8 ատոմային սուզանավ կառուցել, որոնցից առաջիններն արդեն շարքում կլինեն 2036-ին:
Այդ պատճառով Ավստրալիան խզել է Ֆրանսիայի հետ կնքված իր պատմության ընթացքում խոշորագույն պաշտպանական համաձայնագիրը:
Պաշտոնական Փարիզը Ավստրալիայի քայլերն անվանել է «հարված թիկունքից», իսկ Մեծ Բրիտանիայի վարքագիծը որակել իբրեւ «օպորտունիզմի դրսեւորում»: Ֆրանսիայի արտաքին քաղաքական գերատեսչության ղեկավար Ժան-Իվ Լե Դրիանը դաշնակիցների եւ գործընկերների միջեւ նման վարքագիծն անթույլատրելի է համարել:
Մեծ Բրիտանիայի վարչապետ Բորիս Ջոնսոնը, AUKUS-ը համաշխարհային անվտանգության համար կարեւորագույն քայլը որակելով, նշել էր, որ այն որեւէ մեկին դուրս մղելու փորձ չէ: Մեծ Բրիտանիայի վարչապետը Ֆրանսիայի կառավարությանը խորհուրդ էր տվել «հավաքել իրեն» եւ վերջ տալ Ավստրալիայի հետ ռազմական համաձայնագրի խզման թեմային: