ՀՀ վարչապետի մամուլի ծառայությունից հայտնել են, որ Նիկոլ Փաշինյանն այսօր՝ հոկտեմբերի 7-ին, հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ: Քննարկել են հայ-ռուսական հարաբերությունների օրակարգին վերաբերող հարցեր: Անդրադարձ է կատարվել տարածաշրջանում տիրող իրավիճակին եւ տեղի ունեցող զարգացումներին:
Վարչապետը ՌԴ նախագահ Վլադիմիր Պուտինին շնորհավորել է ծննդյան տարեդարձի կապակցությամբ: Նա ընդգծել է, որ Հայաստանը եւ հայ ժողովուրդը բարձր են գնահատում ՌԴ նախագահի ջանքերը եւ բացառիկ դերակատարումը տարածաշրջանում խաղաղության ու կայունության պահպանման գործում, եւ երախտագիտություն է հայտնել Հայաստանի նկատմամբ ցուցաբերվող ուշադրության համար:
ՌԴ նախագահ Վլադիմիր Պուտինն ընդգծել է, որ Ռուսաստանը մեծապես կարեւորում է ռազմավարական դաշնակից Հայաստանի հետ սերտ համագործակցությունը:
Ադրբեջանի նախագահի աշխատակազմից հայտնել են, որ Ռուսաստանի Դաշնության նախագահ Վլադիմիր Պուտինը եւ Ադրբեջանի նախագահ Իլհամ Ալիեւը հոկտեմբերի 7-ին հեռախոսազրույց են ունեցել երկկողմ կապերի զարգացման հեռանկարների եւ Հարավային Կովկասի տարածաշրջանում տիրող իրավիճակի վերաբերյալ:
Ընդգծելով տարբեր բնագավառներում ադրբեջանա-ռուսական երկկողմ բարեկամական հարաբերությունների հաջող զարգացումը՝ պետությունների ղեկավարները վստահություն են հայտնել համագործակցության հետագա ամրապնդման գործում, մտքեր փոխանակել կապերի հեռանկարների վերաբերյալ:
Ալիեւը Պուտինին շնորհավորել է ծննդյան օրվա կապակցությամբ։
Ռուսաստանի Դաշնության նախագահ Վլադիմիր Պուտինն այսօր դարձավ 69 տարեկան։