Երեւանի Դավթաշեն թաղամասում՝ անմիջապես կամրջի հարեւանությամբ (Եղվարդի խճուղի 2/18 հասցեում), մոտ 8000 քմ տարածքի վրա նախատեսվում է 30 հարկանի բնակելի համալիր կառուցել: Ըստ նախագծի՝ այն ունենալու է 704 բնակարան, առաջին հարկում՝ հասարակական նշանակության տարածքներ եւ ստորերկրյա քառահարկ ավտոկայանատեղի շուրջ 500 ավտոմեքենայի համար:
Կառուցապատվելու է տարածքի 42%-ը, կանաչ տարածքները կզբաղեցնեն ուղիղ 40%-ը, մնացածը կլինեն մայթեր, ճեմուղիներ ու ճանապարհ:
Ի սկզբանե «կանաչ» կոչվող տարածքը նախատեսված է եղել ստորերկրյա ավտոկայանի վրա, 30 սմ հողաշերտով, որտեղ միայն խոտ ու թփեր կարող էին լինել: Երեւանի քաղաքապետարանի դիտողությունից հետո նախագծում որոշ փոփոխություններ են արվել, որոնց արդյունքում 1,2 մ հողաշերտի վրա հնարավոր կլինի նաեւ ծառեր տնկել:
Այս մասին տեղեկություն ներկայացրին նախաձեռնող «Դաշտի Քոմփանի» ՍՊԸ ներկայացուցիչները փետրվարի 2-ին՝ նախատեսվող բնակելի համալիրի կառուցման շրջակա միջավայրի վրա ազդեցության նախնական գնահատման (ՇՄԱԳ) հայտի վերաբերյալ հանրային քննարկումների ժամանակ:
Քննարկման մասնակիցները նկատեցին, որ ստորգետնյա հարկերի համար ամբողջովին հանվելու է բազալտե շերտը, ինչը, ըստ մասնագետների, կարող է սեյսմակայունության խնդիրներ առաջացնել, ոչ միայն այս, այլեւ հարեւան շինությունների համար: Վարչական շրջանի քաղաքաշինության եւ հողօգտագործման բաժնի ղեկավար Արամ Մելիքսեթյանն ասաց, որ նախատեսվող տարածքից քիչ հեռու ստորգետնյա ջուր է բխում, արդյո՞ք այս հանգամանքը հաշվի է առնվել: Նախագծողները համառեցին, թե նման բան հնարավոր չէ, երկրաբանական ու երկրաֆիզիկական մանրամասն հետազոտություն է իրականացվել: Սակայն արդյունքներն իրենց հետ չունեին, խոստացան տրամադրել: Նախագծող Աննա Հակոբյանը պնդեց, որ այդտեղ ստորերկրյա աղբյուր չկա, վթարված խողովակ կարող է լինել: Բայց, ինչպես պարզվեց, ջուրը բխում է մոտ 15 մ խորությունից:
Հաջորդ մտահոգող հարցը երթեւեկության կարգավորումն է: Վարչական շրջանի ղեկավարի տեղակալ Արսեն Մելքոնյանը հետաքրքրվեց, թե ինչպես են պատկերացնում նվազագույնը 500 ավտոմեքենայի ելումուտը, երբ տարածքն արդեն իսկ ծանրաբեռնված է, հատկապես առավոտյան, կեսօրին ու երեկոյան 5-ից հետո Եղվարդի խճուղին մշտապես խցանված է: Նա նաեւ մատնանշեց, որ հաշվի առնված չէ հասարակական տարածքը սպասարկող մեքենաների քանակը:
«Աշխարհում նոր տենդենց է, որ նոր բնակելի համալիրների նախագծման ժամանակ ընդհանրապես ավտոկայանատեղեր չեն նախատեսվում»,- պարզաբանեց Աննա Հակոբյանը:
Բայց դե մենք Դանիայում չենք ապրում կամ մեկ այլ եվրոպական երկրում, որտեղ մարդիկ հեծանիվներն են գերադասում: Ավելին՝ փաստ է, որ ընտանիքներում նույնիսկ մեկից ավելի մեքենաներ են լինում:
«Դաշտի Քոմփանի» ընկերության ներկայացուցիչները հավաստիացրին, որ նախագծի վերաբերյալ Ճանապարհային ոստիկանությունն առարկություններ չունի, ընդամենը խորհուրդ են տվել ճանապարհային նշաններ ավելացնել: Սա շարժեց ներկաների զայրույթը, քանի որ հարեւանությամբ սեփական առանձնատների բնակիչներն այսօր իրենց մեքենաները հազիվ են կարողանում կայանել, նաեւ ավտոլվացման կետ կա, որտեղ մշտապես երկուսից ավելի մեքենա է կայանում, մշտական խցանումներն էլ անվիճելի իրողություն են: Նրանք այստեղ տուն են կառուցել ու բնակվում են դեռ 2000-ականների սկզբից, երբ տարածքն ամայի էր՝ քաղաքի աղմուկից ու սթրեսներից զերծ:
«Դաշտի Քոմփանի» ընկերության ներկայացուցիչները խնդրեցին քաղաքաշինական կամ երթեւեկությանը վերաբերող հարցեր չտալ, քանի որ հասարակական քննարկումը ՇՄԱԳ-ին է վերաբերում: Մտքներով չէր անցել, որ խցանումների բազմապատկումը կարող է, օրինակ, օդի հավելյալ աղտոտվածություն եւ աղմուկ առաջացնել, որը լիովին բնապահպանական խնդիր է: Թեեւ այս առումով էլ պատասխան ունեին. «Դե, Երեւանի օդն առանց այն էլ աղտոտված է»:
Գրեթե բոլոր հարցերին կառուցապատողի ներկայացուցիչները պատասխանում էին, թե իբր գլոբալ հարցեր են բարձրացվում, որոնց հասցեատերն իրենք չեն. «Թող Երևանի քաղաքապետարանը լուծի դրանք, կամ օրենքները բարելավվեն, նոր նորմեր մշակվեն»: Վարչական շրջանի ղեկավարն էլ անընդհատ հիշեցնում էր, որ գլոբալ խնդիրներին նորերը պետք չէ ավելացնել:
«Այստեղ միայն գերշահույթ ստանալու նպատակ է դրված,- նկատեց տեղացիներից մեկը,- 704 ընտանիքը մի ամբողջ գյուղ է: Բնակելի համալիրում ո՛չ խաղահրապարակ է նախատեսված, ո՛չ բասկետբոլի կամ ֆուտբոլի դաշտ, ո՛չ այլ ենթակառուցվածքներ»:
Կառուցապատողի ներկայացուցիչներին այս հարցերը վրդովեցրին: «Պետք է կառուցապատողին, նաեւ վարչական շրջանի ղեկավարությանը հարմար լինի»,- ընդգծեցին:
«Եթե 4-րդ թաղամասում կառուցեիք, այս հարցերը չէին առաջանա, բայց 3-րդ թաղամասի այս հատվածում նման ծավալի համալիրն անթույլատրելի է: Դուք գնալու եք, խնդիրները մեզ թողնեք»,- ասաց քաղաքաշինության եւ հողօգտագործման բաժնի պետ Մելիքսեթյանը:
Նախաձեռնող կողմի մոտեցումը նույնն էր. «Մեզնից հետո՝ թեկուզ ջրհեղեղ»:
Բնակիչները մի քանի օր ժամանակ ունեն՝ վարչական շրջանի ղեկավարությանը ներկայացնելու իրենց առարկություններն ու առաջարկությունները:
Բնօգտագործման եւ բնապահպանության մասնագետ եմ։ Ունեմ նաեւ լրագրողի շուրջ 15-ամյա փորձ։ Զույգ մասնագիտություններս հաջողությամբ համատեղում եմ հասարակական գործունեության հետ՝ հանուն բնության եւ առողջ միջավայրի։