Հոկտեմբերի 26-ին Երեւանում Skill Event Marketing ընկերության նախաձեռնությամբ հատուկ ձեւաչափով կանցկացվի արտահերթ Career City Fest-ը, որի նպատակը Հայաստանում գտնվող արցախահայությանն աջակցելն է։
Մերիդիան Էքսպո կենտրոնի տրամադրած հարթակում կհամախմբվեն 80-ից ավելի ընկերությունների, կրթական հաստատությունների եւ կազմակերպությունների ներկայացուցիչներ: Նրանք Արցախից ժամանած մեր հայրենակիցներին կներկայացնեն իրենց լավագույն առաջարկները աշխատանքի, կրթության եւ սոցիալական ոլորտներում։ Միջոցառման մասնակցությունն ազատ է թե՛ ընկերությունների եւ թե՛ այցելել ցանկացող անհատների համար։
Հարթակը, որը բաց է լինելու բոլոր ոլորտների ներկայացուցիչների համար, լուծելու է միանգամից մի քանի կարեւոր խնդիրներ: Այստեղ օգտակար խորհուրդներ կտան աշխատանքի դիմելու հարցում, կծանոթացնեն կրթական եւ մասնագիտական վերապատրաստման հնարավորություններին, կօգնեն հաստատելու նոր եւ օգտակար կապեր։ Ոլորտի մասնագետները կխոսեն Հայաստանի աշխատաշուկայում ներկայանալու ճիշտ քայլերի, ինչպես նաեւ աշխատաշուկայի մարտահրավերների մասին։
Հարթակում նախատեսվում է «Պետությունը որպես գործատու․ հնարավորություններ եւ մարտահրավերներ» թեմայով պանելային քննարկում, որին կմասնակցեն ՀՀ ոստիկանության, ՀՀ ֆինանսների նախարարության եւ այլ գերատեսչությունների ու կազմակերպությունների ներկայացուցիչներ:
Ցանկացողները կարող են գրանցվել Career City Fest․am կայքում: Այցելուների գրանցումը կմեկնարկի հոկտեմբերի 26-ին՝ 11:30-ին։