Ադրբեջանում նախագահական ընտրությունները առաջին անգամ կանցկացվեն ինչպես երկրի մյուս շրջաններում այնպես էլ 2020 թվականի 44-օրյա պատերազմի եւ 2023 թվականի սեպտեմբերյան ռազմական գործողությունների արդյուքնում Բաքվի վերահսկողության ներքո անցած Արցախի տարածքներում։ Ադրբեջանական APA գործակալության փոխանցմամբ այս մասին հայտարարել է Կենտրոնական ընտրական հանձնաժողովի նախագահ Մազահիր Փանահովը։
«Ադրբեջանցի ընտրողներն առաջին անգամ կքվեարկեն ինքնիշխան Ադրբեջանի ողջ տարածքում»,-ասել է ադրբեջանցի պաշտոնյան եւ հավելել․ «Ադրբեջանական բանակի կողմից մեր բոլոր տարածքների նկատամամբ ինքնիշխանությունը վերականգնելուց հետո, քվեարկություն կանցկացնենք այդ շրջաններում»,-ասել է Փանահովը։
Նրա խոսքերով Լեռնային Ղարաբաղում ստեղծվել է 26 ընտրատեղամաս։
Փանահովը նաեւ նշել է, որ ըստ ընտրացուցակների Ադրբեջանում կա 6,5 միլիոն ընտրող, որոնք կքվեարկեն 6537 ընտրատեղամասերում։
Ադրբեջանի ԿԸՀ հանձնաժողովի նախագահի պնդմամբ ներկա պահին գրանցված դիտորդների թիվը հասնում է 90․272-ի, որոնցից միայն 790 են միջազգային։
Հիշեցնենք, որ Ադրբեջանում արտահերթ նախագահական ընտրությունները կանցկացվեն վաղը՝ փետրվարի 7-ին։