ՄԱԿ-ի գլխավոր քարտուղար Անտոնիո Գուտերեշը դատապարտել է Գազայի հատվածի հյուսիս հումանիտար ավտոշարասյունների մուտքը դադարեցնելու մասին Իսրայելի կառավարության որոշումը: Այս մասին նա հայտարարել է Ամմանում կայացած մամուլի ասուլիսի ժամանակ Հորդանանի փոխվարչապետ, արտաքին գործերի նախարար Այման աս-Սաֆադիի հետ հանդիպումից հետո, որը հեռարձակել է Al Jazeera-ն։
«Իսրայելի այս որոշումը լիովին անընդունելի է այն ժամանակ, երբ խաղաղ բնակչությունը սննդի եւ մարդասիրական օգնության խիստ կարիք ունի։ Պաղեստինի ժողովրդի կոլեկտիվ պատիժը արդարացում չունի»,-հայտարարել է Գուտերեշը։
Նշենք, որ մարտի 24-ին Մերձավոր Արեւելքում պաղեստինցի փախստականների օգնության եւ աշխատանքի ՄԱԿ գործակալության (UNRWA) գլխավոր հանձնակատար Ֆիլիպ Լազարինին հայտարարել էր, որ Իսրայելի իշխանությունները այլեւս թույլ չեն տա մարդասիրական ավտոշարասյունների մուտքը Գազայի հյուսիսային հատված։ Նրա խոսքով՝ «Իսրայելի իշխանությունները տեղեկացրել են ՄԱԿ-ին, որ այլեւս չեն համաձայնեցնելու UNRWA-ի պարենային ավտոշարասյունների մուտքը շրջանի հյուսիս»։
Ասուլիսի ժամանակ ՄԱԿ գլխավոր քարտուղարը նաեւ հորդորել է դադարեցնել կրակը Գազայի հատվածումը, որը գնալով ավելի շատ երկրներ են սկսել պահանջել․ «Կրակը պետք է դադարեցվի։ Մեր այս կոչը սկզբում հարաբերականորեն միակն էր, բայց այժմ մենք տեսնում ենք, որ դրան միացող միջազգային հանրության դերակատարների թիվը գնալով աճում է։ Աճում է նաև միջազգային այն դերակատարների թիվը, որոնք վստահ են, որ Ռաֆահում իրականացված ցանկացած ցամաքային գործողություն մարդասիրական աղետի կհանգեցնի»։