Թուրքիայի Հանրապետության արտաքին գործերի նախարար Հաքան Ֆիդանի հրավերով եւՀայաստանի Հանրապետության արտաքին գործերի նախարար Արարատ Միրզոյանի, Ադրբեջանական Հանրապետության արտաքին գործերի նախարար Ջեյհուն Բայրամովի, Ռուսաստանի Դաշնության արտաքին գործերի նախարար Սերգեյ Լավրովի, Իրանի Իսլամական Հանրապետության արտաքին գործերի նախարար Սեյեդ Աբբաս Արաղչիի մասնակցությամբ հոկտեմբերի 18-ին կայացավ «3+3» տարածաշրջանային համագործակցության հարթակի երրորդ հանդիպումը:
Նիստի արդյունքում ընդունվել է համատեղ կոմյունիկե։
Դրանում մասնավորապես նշվում է, որ Հանդիպման ընթացքում նախարարները.
- Վկայակոչել են «3+3» ձևաչափով տեղի ունեցած նախորդ հանդիպումները, որոնք անցկացվել են Մոսկվայում և Թեհրանում։
- Ընդգծել են «3+3» տարածաշրջանային համագործակցության հարթակում հերթական հանդիպման անցկացման կարևորությունը ներկայիս բարդ զարգացումների պայմաններում, որոնք սպառնում են տարածաշրջանային եւ միջազգային խաղաղությանը և կայունությանը, եւ պայմանավորվել են շարունակել համագործակցությունը «3+3» ձևաչափի շրջանակում։
- Հաշվի առնելով բարիդրացիական հարաբերությունների վճռորոշան հրաժեշտությունը, որը բխում է փոխադարձ շահերի իրականացմանն ուղղված համատեղ ջանքերից՝ վերահաստատել են վեճերի խաղաղ կարգավորման, ինքնիշխանության հարգման, քաղաքական անկախության, տարածքային ամբողջականության, միջազգայնորեն ճանաչված սահմանների անքակտելիության, ներքին գործերին չմիջամտելու, ուժի կամ ուժի սպառնալիքի կիրառման արգելքի եւ մարդու իրավունքների հարգման կարևորությունը` հիմնված Միավորված ազգերի կազմակերպության կանոնադրության բոլոր սկզբունքների վրա:
- Տարածաշրջանային երկրների առաջնային դերին համահունչ, կարեւորելով երկխոսությունը, օգտվելով տարածաշրջանային համագործակցության հնարավորություններից եւ միջազգային կարեւորագույն հարցերի շուրջ անկեղծորեն երկխոսելու կարողությունից՝ քննարկել են տարածաշրջանին հուզող չլուծված խնդիրները:
- Գոհունակությամբ արձանագրել են տարածաշրջանի բոլոր երկրների միջեւ հարաբերությունների կարգավորման եւ զարգացման դրական դինամիկան։
- Նշելով տարածաշրջանային տնտեսական համագործակցության կառուցողական դերը տարածաշրջանային վստահության կառուցման, բարգավաճման եւ կայունության հարցերում, ինչն իր հերթին օգուտ է բերում տարածաշրջանի բոլոր ժողովուրդներին՝ հակամարտությունների թեմաների փոխակերպման միջոցով տրամադրելով տնտեսական եւ առեւտրի զարգացման հնարավորություններ, պայմանավորվել են շարունակել ուսումնասիրել փոխգործակցության հնարավորությունները տրանսպորտի, հաղորդակցության, առեւտրի, էներգետիկայի, ներդրումների եւ կապի ոլորտներում։
- Ընդգծել են մշակութային համագործակցության եւ մարդկանց միջև շփումների կարեւորությունը՝ կրթության, գիտության, զբոսաշրջության, մշակույթի եւ սպորտի ոլորտներում համատեղ նախագծերը խրախուսելու նպատակով։
- Համաձայնել են, որ երկկողմ բանակցությունները լրացնելու են կայուն տարածաշրջանային խաղաղության եւ տնտեսական զարգացմանն ուղղված բազմակողմ խորհրդակցությունները:
- Վերահաստատել են, որ «3+3» հարթակի դռները միշտ բաց կլինեն Վրաստանի միանալու համար։
- Մտքեր են փոխանակել Մերձավոր Արեւելքում սրվող իրավիճակի առնչությամբ եւ խստորեն դատապարտել են ՄԱԿ—ի կանոնադրության եւ միջազգային մարդասիրական իրավունքի սկզբունքների կոպիտ խախտումները, որոնք կարող են վտանգել տարածաշրջանային խաղաղությունն ու անվտանգությունը, եւ կոչ արել հարգել միջազգային իրավունքը, կրակի անհապաղ դադարեցման եւ տուժածների համար մարդասիրական աջակցությանն անխոչընդոտ հասանելիության միջոցով վերջ տալ բոլոր ագրեսիաներին եւ վայրագություններին:
- Ընդունելով ահաբեկչական եւ հանցավոր գործունեության աճը մեր տարածաշրջանին մոտ գտնվող տարածքներում՝ իրենց հանձնառությունն են հայտնել համագործակցել ահաբեկչության բոլոր ձեւերի եւ դրսևորումների դեմ՝ ՄԱԿ—ի Անվտանգության խորհրդի համապատասխան բանաձեւերին համապատասխան:
- Ընդգծել են «3+3» տարածաշրջանային համագործակցության հարթակի կանոնավոր նախարարական հանդիպումների, ինչպես նաեւ ընդհանուր հետաքրքրություն ներկայացնող ոլորտներում խորհրդակցությունների կարևորությունը՝ տարածաշրջանում վստահության եւ համագործակցության միջավայրի ամրապնդման նպատակով։
- Պայմանավորվել են, որ հաջորդ հանդիպման վայրն ու ամսաթիվը կհամաձայնեցվեն դիվանագիտական ուղիներով։
Նաեւ նշվում է, որ նախարարները շնորհակալություն են հայտնել Թուրքիայի Հանրապետության արտաքին գործերի նախարարին լավ ընդունելության եւ հանդիպման հաջող անցկացման համար։