Գերմանիայի Դաշնության նախագահ Ֆրանկ-Վալտեր Շտայնմայերը Հայաստանում է։ Նրա այցելությունը կտեւի մինչեւ ապրիլի 2-ը, որից հետո նա կայցելի Ադրբեջան։
Սա պատմության մեջ Գերմանիայի նախագահի առաջին այցն է տարածաշրջան։
Շտայնմայերն այցելել է Ծիծեռնակաբերդի հուշահամալիր՝ հարգանքի տուրք մատուցելու Հայոց ցեղասպանության զոհերի հիշատակին։
Ավելի վաղ Գերմանիայի նախագահականը հայտարարել էր, որ Հայաստան այցի ընթացքում Ֆրանկ-Վալտեր Շտայնմայերը հանդիպումներ կունենա Հայաստանի նախագահ Վահագն Խաչատուրյանի եւ վարչապետ Նիկոլ Փաշինյանի հետ։ Հաջորդիվ նա կայցելի ԹՈՒՄՈ տեխնոլոգիական կենտրոն եւ կմասնակցի մշակութային ընդունելության։
Հայտարարության համաձայն՝ Գերմանիայի նախագահը այցելելու է Դիլիջան, ապա՝ նաեւ Սեւան։
Բաքու սպասվող այցի շրջանակում էլ Գերմանիայի նախագահը կհանդիպի Ադրբեջանի նախագահ Իլհամ Ալիեւի հետ։ Շտայնմայերը կայցելի Բաքվի պատմական կենտրոնը, որը ՅՈՒՆԵՍԿՕ-ի համաշխարհային ժառանգության մաս է, որից հետո կմասնակցի միջկրոնական փոխըմբռնման եւ հանդուրժողականության թեմայով քննարկմանը քրիստոնյա, մուսուլման եւ հրեական համայնքների հոգեւոր առաջնորդների հետ։