Ազգային անվտանգության հարցերով խորհրդական Մայք Ուոլցը կնշանակվի ՄԱԿ-ում Ամերիկայի Միացյալ Նահանգների մշտական ներկայացուցիչ, հայտնել է ԱՄՆ նախագահ Դոնալդ Թրամփը։
«Ռազմադաշտում զինվորական համազգեստով ծառայությունից սկսած՝ մինչեւ Կոնգրես, եւ որպես իմ ազգային անվտանգության խորհրդական՝ Մայք Ուոլցն անշեղորեն աշխատել է՝ մեր երկրի շահերը առաջատար տեղում պահելու համար։ Ես վստահ եմ, որ նա նույն կերպ կգործի իր նոր պաշտոնում», — գրել է Թրամփը Truth Social-ի իր էջում։
ԱՄՆ նախագահը նաեւ նշել է, որ ազգային անվտանգության խորհրդականի պարտականությունները ժամանակավորապես կկատարի պետքարտուղար Մարկո Ռուբիոն։ Միեւնույն ժամանակ, նա կշարունակի ղեկավարել Պետդեպարտամենտը։
Politico պարբերականի աղբյուրների փոխանցմամբ, Ուոլցը կորցրել էր Սպիտակ տան այլ ներկայացուցիչների վստահությունը։ Մարտ ամսին նա պատահմամբ Signal նամակագրային չաթի գաղտնի խմբային զրույցին միացրել էր The Atlantic թերթի գլխավոր խմբագրին։ Այդ զրույցում քննարկվել էր Եմենի «Անսար Ալլահ» շարժման դեմ ուղղված ռազմական գործողությունները։