Հայկական կողմը շարունակում է բանակցել Ադրբեջանի հետ զորքերի հայելային հետքաշման շուրջ՝ հիմք ընդունելով 1974-1978 թվականների խորհրդային քարտեզները։ Դրա մասին հունվարի 5-ին հայտարարել է ՀՀ Անվտանգության խորհրդի քարտուղար Արմեն Գրիգորյանը՝ հավելելով, որ բանակցությունները շարունակվում են:
ԱԽ քարտուղարը հույս է հայտնել, որ այդ ուղղությամբ հնարավոր կլինի հաջողության հասնել՝ արձագանքելով լրագրողների այն դիտարկմանը, թե Ադրբեջանն ավելի վաղ կատեգորիկ «ոչ» է ասել հայկական կողմի առաջարկին։ Գրիգորյանը չի մեկնաբանել, թե Հայաստանի՝ խաղաղության պայմանագրի վերաբերյալ ներկայացրած վերջին տեքստում ինչպիսի փոփոխություններ կան, որոնց Ադրբեջանը դրական է արձագանքել՝ նշելով, որ մեծ առաջընթաց կա, եւ վերջին առաջարկը տարբերվում է նախորդներից, բազմաթիվ կետեր կան, որոնք ընդունելի են իրենց համար։
«Սրա մասին կխոսենք հետագայում, երբ խաղաղության պայմանագրի շուրջ ավելի հստակ առաջընթացներ կունենանք։ Բանակցություններն այն իմաստով, որ տեքստեր են փոխանակվում, ընթանում են։ Հուսանք՝ ավելի առարկայական քննարկումների հնարավորություն շուտով կլինի, եւ դրանց արդյունքում ավելի հստակ հրապարակային կխոսենք»,- նշել է Գրիգորյանը։ Ադրբեջանն իր համաձայնությունը տվել է հաղորդակցության ուղիների ապաշրջափակման սկզբունքների շուրջ, հիմա հայկական կողմն ակնկալում է, որ Ադրբեջանն իր համաձայնությունը նաեւ հրապարակային հաստատի։
Նա հիշեցրել է, որ Հայաստանը շարունակում է պնդել, որ ապաշրջափակվող յուրաքանչյուր ենթակառուցվածք պետք է լինի տվյալ երկրի ինքնիշխանության, իրավազորության ներքո, եւ ապաշրջափակումը պետք է տեղի ունենա հավասարության եւ փոխադարձության սկզբունքների հիման վրա։ «Սրանք են հիմնական սկզբունքները, որոնց շրջանակներում պատրաստ ենք ապաշրջափակումը կազմակերպել եւ աշխատել այս ուղղությամբ։
Հայաստանը շարունակելու է աշխատել ընդհանուր տարածաշրջանային ենթակառուցվածքների ապաշրջափակման ուղղությամբ»,- նշել է Գրիգորյանը։ Անվտանգության խորհրդի քարտուղարը կարեւորել է այն հանգամանքը, որ հաղորդակցության ուղիների ապաշրջափակման հարցում Հայաստանի եւ Իրանի դիրքորոշումները համընկնում են։