ՀՀ առողջապահության նախարար Անահիտ Ավանեսյանը հայտնել է, որ Հայաստանում արտադրվող «Սպուտնիկ Լայթ» պատվաստանյութը մոտ ժամանակներս հասանելի կլինի պոլիկլինիկաներում։ Այժմ իրականացվում է գնման գործընթացը։
ՀՀ էկոնոմիկայի նախարարության, ՀՀ առողջապահության նախարարության եւ Հայաստանում դեղարդյունաբերության առաջատար «Լիկվոր» ընկերության հետ համատեղ մամուլի ասուլիսում Ավանեսյանը շեշտել է, որ Հայաստանում «Սպուտնիկ Լայթ» պատվաստանյութի արտադրման շնորհիվ երկրում դեղագործական արտադրությունը եւս մեկ քայլ առաջ է գնում:
Առողջապահության նախարարը նշել է, թե Հայաստանի քաղաքականությունն այն է, որ երկրում ապահովված լինի պատվաստանյութերի հնարավորինս լայն տեսականի:
Ըստ «Սպուտնիկ Արմենիայի»՝ Ավանեսյանն ասել է, որ քաղաքացիները 3-րդ խթանիչ դեղաչափը ստանալու համար կարող են դիմել եւ ստանալ «Սպուտնիկ Լայթ» տարբերակը: Պատվաստանյութի երկու դեղաչափը ստանալուց 6 ամիս հետո քաղաքացին կարող է ստանալ բուսթերը՝ «Սպուտնիկ Լայթը», և դրանից հետո կարող է պաշտպանված զգալ իրեն եւս 6 ամիս։
Նա ընդգծել է, որ վերապատվաստումը լայն հասկացություն է, ներառում է ինչպես խթանիչ պատվաստանյութը, այնպես էլ լրիվ նոր երկու այլ դեղաչափեր ստանալու ընթացքը:
Ռուսական Ուղիղ ներդրումների ֆոնդի հետ համագործակցությամբ «Լիկվոր» ընկերությունը վերարտադրել է ռուսական արտադրության մայր հումքը՝ սուբստրատը։ Այն վերամշակվել է, անցել տեխնոլոգիական պրոցես, առաջնային փաթեթավորում, երկրորդային փաթեթավորում եւ պահպանվում է սառնարանային ռեժիմով:
Հայաստանում արտադրված «Սպուտնիկ Լայթ» պատվաստանյութն առաջիկայում կարտահանվի։ Անահիտ Ավանեսյանը շեշտել է, որ Հայաստանի շուկան բավական փոքր է «Սպուտնիկ Լայթ» պատվաստանյութի սպառման անհրաժեշտ ծավալն ապահովելու համար։ Ավանեսյանը նշել է, որ արտահանելու համար Մերձավոր Արեւելքի մի շարք երկրների հետ բանակցություններ են ընթանում, աֆրիկյան որոշ երկրների հետ էլ քննարկումներ են սկսվել։
Հայաստանը «Սպուտնիկ Լայթի» արտադրությանը հավանություն տվել է այս տարվա սեպտեմբերի 6-ին։