ՀՀ արտակարգ իրավիճակների նախարարությունը հայտնել է, որ այս պահին ձյուն է տեղում հայաստանյան մարզերի մեծ մասում՝ Շիրակի մարզի գրեթե բոլոր բնակավայրերում, Լոռու մարզի Տաշիր, Սպիտակ, Վանաձոր, Տավուշի մարզի Դիլիջան, Գեղարքունիքի մարզի Մարտունի, Ճամբարակ, Սեւան, Վայոց ձորի մարզի Ջերմուկ քաղաքներում, Արագածոտնի մարզի Արագածի եւ Ապարանի տարածաշրջաններում։
Շիրակի մարզի Աշոցք գյուղում ձնաբուք է: Դժվարանցանելի են Շիրակի մարզի Ամասիա-Բերդաշեն եւ Աշոցք-Կրասար ավտոճանապարհները։ Իսկ Շիրակի Վարդաղբյուր-Բավրա եւ Արագածոտնի մարզի Ապարան-Արագած ավտոճանապարհներին տեղ-տեղ մերկասառույց է։ Վարդենյաց լեռնանցքը դժվարանցանելի է կցորդիչով բեռնատարների համար։
Վարորդներին խորհուրդ է տրվում երթեւեկել բացառապես ձմեռային անվադողերով։
Վրաստանի ՆԳՆ ԱԻ դեպարտամենտից եւ ՌԴ ԱԻՆ Հյուսիսային Օսիայի ճգնաժամային կառավարման կենտրոնից հայտնել են, որ Ստեփանծմինդա-Լարս ավտոճանապարհը եւս շարունակում է փակ մնալ բոլոր տեսակի փոխադրամիջոցների համար: