Արցախի ՆԳՆ արտակարգ իրավիճակների պետական ծառայությունից հայտնել են, որ 2021-ի դեկտեմբերի 20-26-ը ԱԻ պետական ծառայության 911 ահազանգման կենտրոնում գրանցվել է 647 զանգ:
Ծառայության արագ արձագանքման հատուկ ստորաբաժանման օպերատիվ խումբը շաբաթվա ընթացքում հայտնաբերել է Արցախյան վերջին պատերազմում զոհված եւս մեկ զինծառայողի աճյուն: Զինադադարից հետո մինչ օրս հայտնաբերվել եւ տարհանվել է 1704 աճյուն:
Տարբեր տեսակի ու տրամաչափի ռազմամթերքի հայտնաբերման եւ դրանց ոչնչացման աշխատանքների ուղղությամբ սակրավորական խմբերը գործընկեր կառույցների հետ ամենօրյա ռեժիմով Արցախի Հանրապետության բոլոր շրջաններում հետախուզական աշխատանքներ են տանում:
Շաբաթվա ընթացքում հայտնաբերվել եւ վնասազերծվել են հրթիռակասետային 7 ռումբ, գնդիկաբեկորային 9 ավիառումբ եւ 1 արկ: Գրանցվել է տեխնածին բնույթի 18, սոցիալ-կենցաղային բնույթի 27 կանչ: