Apple ընկերությունը հայտնել է, որ կորոնավիրուսի «Օմիկրոն» մանրէահիմքի արագ տարածման պատճառով փակում է Նյու Յորքի իր բոլոր 12 խանութները։ Ընկերության ներկայացուցիչն ասել է, որ հաճախորդները կարող են ստանալ առցանց պատվերները։
ԱՄՆ-ում կորոնավիրուսով վարակվածների 75 տոկոսը բաժին է ընկնում «Օմիկրոնին»։
Վարակի ռեկորդային ցուցանիշ է գրանցվել
Հունաստանում մեկ օրվա ընթացքում գրանցվել է կորոնավիրուսային վարակման ռեկորդային՝ 9284 դեպք։ Հունաստանի առողջապահության նախարար Թանոս Պլեուրիսը հայտնել է, որ ռեկորդային աճը պայմանավորված է Հունաստանում գերակշռող «Օմիկրոնով»: Վարակվածների թիվը օրական աճում է 200-300%-ով, մինչդեռ «Դելտայի» դեպքում աճը 10-15% էր:
Նախարարը նշել է, որ «Օմիկրոնը» չի հանգեցնում հոսպիտալացումների թվի ավելացման, մինչդեռ «Դելտայով» վարակվածները վերակենդանացման բաժանմունքներում են։
Դանիան խստացնում է սահման մուտք գործելու կանոնները
«Օմիկրոնի» արագ տարածման ֆոնին Դանիան խստացնում է իր սահմանները հատելու կանոնները. երկիր մուտք գործող բոլոր մարդկանցից պահանջվում է քովիդ թեստի բացասական արդյունք՝ անկախ նրանից պատվաստված են, թե ոչ։ Կանոններն ուժի մեջ կլինեն առնվազն երեք շաբաթ։
Վերջին օրերին Դանիան հակառեկորդներ է գրանցում վարակվածության մակարդակով։ Դանիացի բժիշկները եւս համարում են, որ «Օմիկրոնը» խիստ վարակիչ է, բայց հիմնականում լուրջ հետեւանքների չի հանգեցնում։