Հայաստանում նոյեմբերի 12-ին մեկնարկել է խոշոր եղջերավոր կենդանիների հաշվառման եւ համարակալման գործընթացը՝ համաձայն «Հայաստանի Հանրապետությունում խոշոր եղջերավոր կենդանիների համարակալման եւ հաշվառման ծրագիրը եւ միջոցառումների կատարման ժամանակացույցը հաստատելու մասին» Կառավարության 2020 թվականի հունիսի 11-ի N 954-Լ որոշման։ Դա պարտադիր ծրագիր է, որն իրականացվելու է բոլոր մարզերում, լինելու է մշտական՝ հաշվի առնելով կենդանիների ծինը, սպանդը եւ ներմուծումները։ Գործընթացը մեկնարկել է Արմավիրի մարզից։
Համարակալված կենդանուն հնարավոր կլինի գրավադրել, ապահովագրել եւ անհրաժեշտության դեպքում դրա համար ստանալ փոխհատուցում, իսկ կենդանու կորստի կամ այլ դեպքերում ականջապիտակի միջոցով հնարավոր կլինի գտնել եւ վերադարձնել անասնատիրոջը։
Խոշոր եղջերավոր կենդանիների համարակալման եւ հաշվառման ծրագրի իրականացման վերահսկողությունը վերապահված է Սննդամթերքի անվտանգության տեսչական մարմնին (ՍԱՏՄ)։ ՍԱՏՄ ղեկավար Գեորգի Ավետիսյանը վստահեցնում է՝ կենդանիների համարակալման եւ հաշվառման համակարգը նպաստում է հիվանդությունների դեմ պայքարին, անասնապահության եւ անասնաբուժության զարգացմանը, համաճարակային իրավիճակի բարելավմանը, սննդամթերքի անվտանգությանը։
Ի պատասխան «Ալիք Մեդիայի» գրավոր հարցման՝ Գեորգի Ավետիսյանը նշում է՝ խոշոր եղջերավոր կենդանիների հաշվառման եւ համարակալման գործընթացի նպատակն է համարակալման եւ հաշվառման ինստիտուտի կայացումը, հանրապետության տարածքում կենդանիների տեղաշարժի նկատմամբ վերահսկողության բարելավումը։ Հաշվառումն ու համարակալումը հնարավորություն կտան անասնաբուժասանիտարական տեսանկյունից բարձրորակ հումք եւ մթերք արտադրելու։ Կենդանիների եւ մարդկանց համար ընդհանուր՝ զոոնոզ վարակիչ հիվանդություններից բնակչության պաշտպանության մակարդակը եւս հնարավոր կլինի բարձրացնել։
«Խոշոր եղջերավոր կենդանիների հաշվառումը եւ համարակալումը կնպաստեն նաեւ տավարաբուժության տեղեկատվական հարթակի կատարելագործմանը, կենդանիների կերակրման, պահպանման անասնահամաճարակային միջոցառումների եւ կենդանիների սպանդի, կենդանական ծագման հումքի վերամշակման եւ պահեստավորման գործընթացին»,- նշում է Գեորգի Ավետիսյանը։
ՍԱՏՄ ղեկավարը վստահեցնում է՝ խոշոր եղջերավոր կենդանիների հաշվառումն ու համարակալումը կնպաստի նաեւ դրանց իրացմանը։ Կենդանիների եւ կենդանական ծագման հումքի եւ մթերքի միջազգային առեւտրի հարթակներում կարեւորվում է խոշոր եղջերավոր կենդանիների հաշվառումն ու համարակալումը։
Գեորգի Ավետիսյանն ասում է՝ խոշոր եղջերավոր կենդանիների համարակալումն անասնատերերի համար հարկային որեւէ պարտավորություն չի առաջացնում, եւ նրանք չեն ընդդիմանում այդ գործընթացին։ Համարակալման եւ ականջապիտակներ փակցնելու գործընթացն իրականացնում են համայնքային անասնաբույժները։ Ականջապիտակների ամրացումը վտանգավոր չէ կենդանու առողջության համար․ այդ պրակտիկան ընդունված է աշխարհի բոլոր առաջադեմ երկրներում։
Վայոց ձորի մարզի Արենի համայնքի համանուն բնակավայրի բնակիչ Սիլվա Ղարախանյանի ընտանիքը խոշոր եղջերավոր կենդանիներ ունի: Քանի որ ծրագիրը պարտադիր է, նա բնականաբար չի ընդդիմանալու համարակալման գործընթացին, բայց դրական կարծիք չունի ծրագրի մասին։ Ասում է՝ լսել է, որ պատկան մարմինները հայտարարել են՝ խոշոր եղջերավոր կենդանիների հաշվառումն ու համարակալումն անասնատերերի համար հարկային որեւէ պարտավորություն չեն առաջացնում, բայց ենթադրում է՝ առաջիկայում նաեւ հարկային պարտավորություններ կլինեն։
Ղարախանյանը պատմում է՝ իրենց բնակավայրում արոտավայրերը շատ քիչ են։ Նախկինում սահմանին մոտ հատվածում արոտավայրեր կային․ անասնապահները կենդանիներին տանում էին այնտեղ, արածեցնում, բայց թշնամու առաջխաղացումից հետո վախենում են կենդանիներին այնտեղ տանելուց։
«Բնակավայրում անասուն պահող մարդիկ շատ չեն, անասնապահներրի մեծ մասն էլ խոտը գնում է, ուստի եկամուտը փոքր է։ Եթե հանկարծ հարկային պարտավորություններ էլ առաջանան, անասնապահներն անելանելի վիճակում կհայտնվեն, եւ ես ենթադրում եմ, որ շուտով դա էլ կլինի»,- եզրափակում է Սիլվա Ղարախանյանը։
Լրագրողն իր մասնագիտական գործունեությամբ հասարակական կարծիք է ձեւավորում։ Հենց ա՛յդ գիտակցումով եմ առաջնորդվում եւ աշխատում։