Investigate պարբերականը հպանցիկ անդրադարձել է Միջազգային օլիմպիական կոմիտեի գործող նախագահ Թոմաս Բախի՝ ամենեւին ոչ սպորտային հետաքրքրություններին, նրա մարզական անցյալին, իրարամերժ ներկային եւ «խոստումնալից» ապագային։
«Աֆղանստան (1979 թվականի դեկտեմբերին) խորհրդային զորքերի ներխուժումից ամիսներ անց ավելի քան 60 երկիր, իբրեւ բողոքի միջոց, բոյկոտեց 1980 թվականի Մոսկվայի ամառային օլիմպիական խաղերը։ Բոյկոտին միացած երկրների թվում էր Գերմանիայի Դաշնային Հանրապետությունը։
Ռուսական եռագույնի հետ առնչվող ամեն բան արդարացնելու հակումը
Միջազգային օլիմպիական կոմիտեի գործող նախագահ, ազգությամբ գերմանացի Թոմաս Բախը, որն այն օրերին օլիմպիական խաղերին պատրաստվող մարզիկ էր, հանդես եկավ բոյկոտի դեմ. արդեն այն ժամանակ խորհրդային զորքերի միջամտությունն ուրիշի ներքին գործերին նրան վճռական միջոցներ պահանջող խնդիր չէր թվում։ Բազմաթիվ հարցազրույցներում Բախը հաճախ համոզմունք է հայտնել, որ եթե Մոսկվայի Օլիմպիական խաղերը չբոյկոտվեին, իր մարզական կարիերան առավել շլացուցիչ կլիներ։
Ավելի քան 40 տարի անց էլ Թոմաս Բախի հայացքները չեն փոխվել։ Ռուսների հանդեպ նրա սերը սովորույթի պես մի բան է դարձել․ անկեղծորեն հիանում է Պուտինով, մտերմություն է անում ռուս օլիգարխների հետ եւ հակված է արդարացնելու այն ամենը, ինչն առնչվում է ռուսական եռագույնի հետ։ Ի լրումն` նա նաեւ բիզնես շահեր ունի Ռուսաստանում։
«Փողը հոտ չունի» արտահայտությունն իսկը նրա մասին է
Միջազգային օլիմպիական կոմիտեի նախագահ Թոմաս Բախը նաեւ փայտանյութ մշակող մեքենաների եւ համակարգերի՝ աշխարհի խոշորագույն արտադրող Weinig Group կոնցեռնի՝ Michael Weinig AG եւ Weinig International AG ընկերությունների վերահսկիչ խորհրդի նախագահն է: Weinig Group-ի գլխամասային գրասենյակը Գերմանիայում է, իսկ Weinig RUS դուստր ձեռնարկությունը վաղուց հաջողությամբ գործունեություն է ծավալում Ռուսաստանում։ Թոմաս Բախը շարունակ խոսում է սպորտի չեզոքությունից, մինչդեռ ՌԴ-ում 11 ներկայացուցչություն եւ Մոսկվայում կենտրոնական գրասենյակ ունեցող ընկերությունից եկամուտ ստացող մարդն ընդունակ չէ հետեւելու սեփական հանձնարարականներին։
1980-ի մոսկովյան օլիմպիադայի շուրջ ստեղծված իրավիճակը բաց թողնված հնարավորություն համարող Բախը որոշել է 2024-ի Օլիմպիական խաղերից առավելագույն օգուտ քաղել։ «Փողը հոտ չունի» արտահայտությունն իսկը նրա մասին է։ Ո՞վ իմանա, գուցե Ռուսաստանի եւ Բելառուսի մարզիկներին 2024-ի Օլիմպիական խաղերին մասնակցել թույլ տալու՝ Թոմաս Բախի նախաձեռնությունը սոսկ ռուսական կերակրատաշտի մոտ ավելի երկար մնալու եւ հնարավորությունը բաց չթողնելու ցանկություն է»:
Investigate, ապրիլի 20, 2023 թվական