Պաշտոնական այցով Չինաստան ժամանած ՌԴ նախագահ Վլադիմիր Պուտինը հանդիպել է Չինաստանի առաջնորդ Սի Ցզինպինի հետ։
Չինաստանն առաջին երկիրն է, ուր Պուտինը այցելում է նախագահի պաշտոնը կրկին ստանձնելուց հետո։ Ուղեւորության մեկնարկից առաջ Պուտինի օգնական Յուրի Ուշակովն ընդգծել էր, որ առաջին պաշտոնական այցի համար Չինաստանի ընտրությունը պատասխան էր Սի Ցզինպինի բարեկամական ժեստին, ով մեկ տարի առաջ վերընտրվելուց հետո այցելել էր Ռուսաստանի Դաշնություն։
«Մեկ մեկու առաջին արտասահմանյան այցեր կատարելու լավ ու բարի ավանդույթ է ձեւավորվել մեզ մոտ, եւ սա համարվում է այն կարեւորության հստակ հաստատումը, որը եւ դուք եւ մենք՝ Մոսկվայում եւ Պեկինում, տալիս ենք երկկողմ հարաբերությունների հետեւողական զարգացմանը, համապարփակ գործընկերության եւ ռազմավարական փոխգործակցությանը»,-հայտարարել է Պուտինը՝ Սի Ցզինպինի հետ հանդիպմանը։
Չինաստանի Ժողովրդական Հանրապետության ղեկավարն էլ իր հերթին հիշեցրել է, որ Պուտինի հետ հանդիպել է առնվազն 40 անգամ։ «Նման սերտ կապերը թույլ են տալիս նախանշել ռուս-չինական հարաբերությունների կայուն եւ արագ աճի դինամիկան պահպանելու ռազմավարական ուղղությունները, որոնք ամենեւին էլ հեշտ չեն եղել եւ, հետեւաբար, արժանի են առավել զգույշ վերաբերմունքի»,-ասել է Սին եւ հավելել․ «Չին-ռուսական հարաբերությունները իրենցից ներկայացնում են մեծ տերությունների եւ հարեւան երկրների հարաբերությունների էտալոն, որը առանձնանում է փոխադարձ հարգանքով, վստահությամբ, բարեկամությամբ եւ փոխշահավետությամբ»։
ՌԴ նախագահի եւ ՉԺՀ առաջնորդի հանդիպմանը մասնակցել են նաեւ երկու երկրների բարձրաստիճան այլ ներկայացուցիչներ։ Այսպես, ռուսական պատվիրակության կազմում, ի թիվս այլոց, եղել են պաշտպանության նախկին նախարար, իսկ այժմ ՌԴ Անվտանգության խորհրդի քարտուղար Սերգեյ Շոյգուն եւ ռազմական գերատեսչության նոր ղեկավար Անդրեյ Բելոուսովը։
Պուտինի՝ Պեկին այցի ծրագիրը ենթադրում է մի շարք բանակցությունների անցկացում տարբեր ձեւաչափերով։ Մասնավորապես, նախատեսվում է թեյի շուրջ «տետ-ա-տետ» հանդիպում Ռուսաստանի Դաշնության Նախագահի եւ ՉԺՀ նախագահի միջեւ։