Արեւելյան հարեւանից հնչող հայտարարությունները շարունակում են կասկածի տակ դնել Հայաստանի տարածքային ամբողջականությունը։ Այդ մասին հայտարարել է Հայաստանի արտգործնախարար Արարատ Միրզոյանը՝ ելույթ ունենալով ՄԱԿ-ի մարդու իրավունքների խորհրդի 58-րդ նստաշրջանի բարձրաստիճան հատվածում։
«Մեկ տարի առաջ իմ ելույթում ես մանրամասն անդրադարձա այն մարտահրավերներին, որոնց բախվում էր Հայաստանը։ Ցավոք, այդ մարտահրավերների մեծ մասը դեռեւս մնում է չլուծված՝ չնայած իմ երկրի գործադրած ահռելի ջանքերին։ Մեր արեւելյան հարեւանից հնչող հայտարարությունները շարունակում են կասկածի տակ դնել Հայաստանի տարածքային ամբողջականությունը՝ չնայած միմյանց տարածքային ամբողջականության ճանաչմանը՝ հիմնված 1991 թվականի Ալմա-Աթայի հռչակագրի վրա, որը վերահաստատել էր, որ Հայկական ԽՍՀ-ի եւ Ադրբեջանական ԽՍՀ-ի վարչական սահմանները դարձել էին անկախ հանրապետությունների միջազգային սահմաններ»,- ասել է Միզրոյանը։
Արտգործնախարարը նաեւ ընդգծել է, որ բացի այս ամենից՝ Ադրբեջանում «շարունակում է ընթանալ կեղծ դատավարությունը 23 հայ անձանց նկատմամբ, որոնք կամայականորեն են ազատազրկված, ընդ որում՝ անտեսելով պատշաճ դատավարության համար անհրաժեշտ մարդու իրավունքների չափանիշերը»։
«Մեկ տարի առաջ ՄԱԿ-ի մարդու իրավունքների հարցերով բարձր հանձնակատարը տեղեկացրեց այս Խորհրդին, որ հանձնակատարի գրասենյակը երկու առաքելություն է գործուղել Հայաստան՝ ավելի քան 115,000 էթնիկ հայերի իրավիճակի վերաբերյալ տեղեկություն հավաքելու նպատակով։ Մենք համոզված ենք, որ այդ առաքելության արդյունքները կարեւոր ներդրում կլինեն հաշտեցման ջանքերն առաջ մղելու գործում»,- հայտարարել է Միրզոյանը։
ՀՀ արտգործնախարարը նաեւ հայտարարել է, որ Երեւանը, հավատարիմ մնալով տարածաշրջանում խաղաղության եւ կայունության հաստատման օրակարգին, մի քանի կառուցողական առաջարկներ է արել ադրբեջանական կողմին, այդ թվում՝ Խաղաղության պայմանագրի, տրանսպորտային ենթակառուցվածքների բացման, սպառազինությունների փոխադարձ վերահսկման ու վերիֆիկացիայի մեխանիզմի եւ այլ համատեքստերում՝ նկատի ունենալով բոլոր հիմնական խնդիրները կարգավորող ռազմավարական համաձայնագրի կնքման անհրաժեշտությունը։
«Մենք համոզված ենք, որ երկու կողմերի կառուցողական արձագանքը, հետագա ներգրավվածությունը եւ քաղաքական կամքի դրսեւորումը մեծապես կնպաստեն մեր տարածաշրջանում խաղաղության նոր դարաշրջանի բացմանը։ Հենց այս համատեքստում ես կցանկանայի եւս մեկ անգամ վերահաստատել հայկական կողմի պատրաստակամությունը թշնամանքի էջը շրջելու եւ ինստիտուցիոնալիզացված խաղաղություն հաստատելու հարցում։ Մենք ոչ միայն պատրաստ ենք դրան, այլեւ չենք շեղվելու այդ ուղուց»,- հայտարարել է ՀՀ ԱԳ նախարար Միրզոյանը։