Հայաստանի պաշտպանության նախարարությունը հերքում է Բաքվի այն հաղորդագրությունը, թե իբր մարտի 30-ի 22:30-ից մինչեւ մարտի 31-ի 04:35-ը ՀՀ ԶՈՒ ստորաբաժանումները կրակ են բացել սահմանագոտու արեւելյան եւ հարավարեւելյան հատվածներում տեղակայված ադրբեջանական դիրքերի ուղղությամբ։
Պաշտպանության նախարարությունը միեւնույն ժամանակ հայտնում է, որ մարտի 31-ին՝ 00:50-ի սահմաններում, Ադրբեջանի ԶՈՒ ստորաբաժանումներն են կրակ բացել Սյունիքի մարզի Խնածախ բնակավայրի ուղղությամբ, ինչի հետեւանքով վնասվել է բնակելի տուն: Տուժածներ չկան:
Պաշտպանական գերատեսչությունը հիշեցնում է, որ ՀՀ վարչապետի աշխատակազմը առաջարկել է հրադադարի ռեժիմի խախտման դեպքերի եւ/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչ օրս Բաքուն չի արձագանքել։
Հայաստանի պաշտպանության նախարարությունը վերահաստատում է, որ վարչապետի աշխատակազմի դիրքորոշմանը համապատասխան՝ պատրաստ է հետաքննելու Ադրբեջանի ՊՆ-ի հաղորդագրությունը հիմնավորող փաստերը՝ դրանք հայկական կողմին փոխանցելու պարագայում։
«Միեւնույն ժամանակ ադրբեջանական կողմին կոչ ենք անում հետաքննել Խնածախ բնակավայրի բնակելի տան գնդակոծման փաստը եւ հանդես գալ հրապարակային պարզաբանումներով»,- ասվում է հաղորդագրության մեջ։
Երեկ ՀՀ ՊՆ-ն հերքել էր ադրբեջանական կողմի այն հայտարարությունը, թե իբր մարտի 29-ի երեկոյան եւ մարտի 30-ի առավոտյան ՀՀ ԶՈՒ ստորաբաժանումները կրակ են բացել սահմանագոտու արեւելյան եւ հարավարեւելյան հատվածների ադրբեջանական դիրքերի ուղղությամբ։