Վրաստանի էկոնոմիկայի եւ կայուն զարգացման նախարարությունից հայտնել են, որ Հայաստանի եւ Վրաստանի էներգաշուկաների օպերատորները համաձայնագիր են ստորագրել վթարային իրավիճակներում էլեկտրաէներգիայի տրամադրման վերաբերյալ։
Ըստ «Սպուտնիկ Արմենիա»-ի՝ փաստաթուղթը ստորագրվել է Թբիլիսիում Վրաստանի պետական էլեկտրահամակարգի եւ Հայաստանի «Շուկայական քլիրինգային կենտրոնի» միջեւ հայ–վրացական համատեղ աշխատանքային խմբի նիստի շրջանակում, որին մասնակցել են Վրաստանի էկոնոմիկայի եւ կայուն զարգացման փոխնախարար Ռոմեո Միկաուտաձեն եւ ՀՀ տարածքային կառավարման եւ ենթակառուցվածքների փոխնախարար Հակոբ Վարդանյանը։
Կողմերն ընդգծել են էլեկտրաէներգետիկայի ոլորտում երկու երկրների համագործակցության կարեւորությունն ու ընդգծել առաջնահերթ ուղղությունները։
Միկաուտաձեն ընդգծել է նաեւ տարածաշրջանում կայունության պահպանման համար երկրների միջեւ համագործակցության կարեւորությունը։ Նա դրական է գնահատել Վրաստանի եւ Հայաստանի միջեւ էներգետիկ համակարգում համագործակցությունն ու նշել, որ երկրները կարող են հետագայում եւս շարունակել զարգացնել էլեկտրահաղորդման անդրսահմանային ցանցերն ու այդպիսով նպաստել էլեկտրաէներգիայի տարանցման հոսքերի աճին։
Կողմերն շեշտել են նաեւ Սեւծովյան մալուխի նախագծի կարեւորությունը, որի իրագործումից հետո Վրաստանի էներգահամակարգը կկապվի ռումինականի հետ, ինչը նոր հնարավորություններ է ստեղծում Վրաստանից եւ տարածաշրջանի այլ երկրներից դեպի ԵՄ էլեկտրաէներգիայի արտահանումն ավելացնելու համար։