Նախօրեին հինգ հայ ռազմագերիների ազատ արձակումը ողջունել են ԱՄՆ Պետդեպարտամենտի խոսնակ Նեդ Փրայսը, Եվրոպական խորհրդի նախագահ Շառլ Միշելը եւ Հարավային Կովկասի եւ Վրաստանում ճգնաժամի հարցերով Եվրամիության հատուկ ներկայացուցիչ Տոյվո Կլաարը:
«Ողջունելի է այսօր Ադրբեջանի կողմից հինգ հայ ձերբակալվածների ազատ արձակման վերաբերյալ լուրը օգոստոսի 31-ին Բրյուսելում տեղի ունեցած եռակողմ հանդիպումից հետո: Կարեւոր մարդասիրական ժեստ է եւ հատկանշական է նաեւ, որ հանձնումը տեղի է ունեցել առանց միջնորդների»,- իր թվիթերյան գրառման մեջ նշել է Կլաարը:
Միացյալ Նահանգների Պետդեպարտամենտի խոսնակ Նեդ Փրայսը, ողջունելով հայ գերիների հայրենիք վերադարձի մասին հաղորդումները, նշել է, որ դա դրականորեն կանդրադառնա Հայաստանի եւ Ադրբեջանի խաղաղ գործընթացի համար։
«Հուսով ենք՝ մնացած բոլոր ձերբակալվածները շուտով կվերադառնան տուն, եւ Ադրբեջանն ու Հայաստանը կշարունակեն քայլեր ձեռնարկել վստահություն ձեւավորելու եւ առկա տարաձայնությունները լուծելու համար»,- իր թվիթերյան գրառման մեջ նշել է Նեդ Փրայսը:
Եվրոպական խորհրդի նախագահ Շառլ Միշելն իր հերթին ողջունելով Հայաստանին եւ Ադրբեջանին հինգ հայ գերիների հանձնման առթիվ, թվիթերյան գրառման մեջ նշել է, որ այն տեղի է ունեցավ երկկողմ ձեւաչափով բանակցության արդյունքում: «Հումանիտար բոլոր առկա խնդիրների լուծումը առանցքային առաջնահերթություն է»,- շեշտել է Միշելը: