Ռուսաստանում oգտագործված ավտոմեքենաների գները սկսել են աճել։ Ընդ որում՝ աճը նկատվել է դեռ օգոստոսից։ Մասնագետները սա բնական են համարում, քանի որ արձակուրդային սեզոնից հետո աշխուժություն է նկատվում։
Արձանագրվել է նաեւ նոր ավտոմեքենաների պակասորդ, որը եւս նպաստում է օգտագործված ավտոմեքենաների գների ամրապնդմանը։ Այս ամենով հանդերձ, դրանք չեն հասել այս տարվա մարտ-ապրիլի գնային ցուցանիշներին, որոնք կարելի է համարել գնային առավելագույն նիշ։
Ռուսական «Ավտոստատի» տվյալներով՝ ավտոմեքենաների միջինացված արժեքը հունվարից հունիսի համար 1,2 միլիոն ռուբլի է (60% աճ), իսկ ահա «երիտասարդ» կամ մինչեւ յոթ տարեկան ավտոմեքենաների միջինացված գինը նշված ժամանակահատվածի համար՝ մոտ 2,3 միլիոն ռուբլի (51%- աճ)։ Նոր ավտոմեքենաների մասով գները չեն փոխվել գարնանից ի վեր։
Ընդ որում՝ ռուսական ավտոշուկայի հիմնական խաղացողների գնային կայունացումն ու աճը տարբեր դրսեւորումներ են ունեցել։ Մասնավորապես «Դրոմ» ընկերությունում գնանկումը արձանագրվել է ապրիլ-հունիսին, իսկ հուլիսից սկսվել է օգտագործված ավտոմեքենաների գնաճը։ Օգոստոսին օգտագործված մեքենայի գինն այս ընկերությունում աճել է 2%-ով՝ կազմելով 885 հազար ռուբլի։
«Ֆրեշ» ընկերությունում օգոստոսին, հուլիսի համեմատ, օգտագործված մեքենաների գնաճը եղել է 1,5%՝ հասնելով 1,2 միլիոն ռուբլու։ Տարեսկզբի համեմատ օգտագործված ավտոմեքենաներն այս ընկերության վաճառքի սրահներում թանկացել են 18,5%-ով։ Պրեմիում սեգմենտի ավտոմեքենաների գինն էլ կայունացել է եւ արդեն ամառվա վերջին եղել է 7,7 միլիոն ռուբլի։
«Ավտո․ռու» ընկերության մասնագետների կարծիքով օգտագործված մեքենաների գները հունիսին արդեն կայունացել էին ու դուրս եկել «կայուն կորի» վիճակի։ Եթե փետրվարին մինչեւ յոթ տարեկան ավտոմեքենաներն այս ընկերությունում արժեին 1,7 միլիոն ռուբլի, ապրիլին այդ գինը հասել էր 2,4 միլիոնի, հունիսին՝ 2,2 միլիոնի։ Տարեսկզբի համեմատ միջինը 28%-ով թանկացել են մինչեւ հինգ տարեկան ավտոմեքենաները։ Մյուս՝ «Ավիլոն», «Ալտուֆյեւո-Ավտոդոմ» եւ այլ ընկերություններում եւս նույն պատկերն է։
Պատրաստեց Արման Գրիգորյանը