Ըստ Խաղաղության խնդիրների ուսումնասիրության ստոկհոլմյան ինստիտուտի (Sipri)՝ աշխարհում ռազմական արդյունաբերության վիճակի մասին զեկույցի՝ Մերձավոր Արեւելքը եւ Հյուսիսային Աֆրիկան դառնում են զենքի արտադրության կարեւոր տարածաշրջան։ Դա շրջադարձային կարելի է համարել տարածաշրջանի համար, քանի որ պատմականորեն այստեղ սեփական ռազմական հզորություններն ավելացնելու համար հիմնականում ապավինել են արտաքին այնպիսի ուժերի, ինչպիսիք են Միացյալ Նահանգներն ու Ռուսաստանը։
Մերձավոր Արեւելքում զենք-զինամթերքի հիմնական արտահանողի կարգավիճակը շարունակում է պահպանել Իսրայելը, սակայն ե՛ւ Թուրքիան, ե՛ւ Իրանն արդեն ներկայանում են որպես զենքի կարեւոր արտադրողներ։ Թուրքիան դեռ նախքան Ուկրաինայում պատերազմի սկսվելը զենք-զինամթերքի մատակարարումների ծավալով աշխարհում 12-րդ տեղում էր։ Ուկրաինական պատերազմում Թուրքիան աչքի է ընկնում Կիեւին Bayraktar TB-2 անօդաչու թռչող սարքերը մատակարարելով։ Իր հերթին Իրանն էլ «մտավ խաղի մեջ» եւ ռուսական կողմին սկսեց մատակարարել «Շահեդ 136» անօդաչուները։
«Ըստ էության՝ տեղի է ունենում Մերձավոր Արեւելքում զենք-զինամթերքի վաճառքի ոլորտի վերակառուցում, եւ գործընթացն առաջ է մղվում գերտերությունների կողմից իրենց ռազմական արտադրանքը միջազգային շուկայում վաճառելու հնարավորությունների վերագնահատման հետնապատկերում»,- Sipri-ի զեկույցին անդրադառնալով՝ նշել է «Middle East Eye» պարբերականը։
Պատրաստեց Արման Գրիգորյանը