Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար, Բելառուսի ներկայացուցիչ Ստանիսլավ Զասի պաշտոնավարման ժամկետը լրանալու կապակցությամբ հունվարի 1-ից երեք տարի ժամկետով այդ պաշտոնն է ստանձնել Ղազախստանի ներկայացուցիչ Իմանգալի Տասմագամբետովը։
Նրան ՀԱՊԿ գլխավոր քարտուղարի պաշտոնում նշանակելու մասին որոշումն ընդունվել է 2022-ի նոյեմբերի 23-ին Երեւանում անցկացված Հավաքական անվտանգության խորհրդի նիստում։ Անցյալ տարեվերջին ՌԴ ԱԳՆ պաշտոնական ներկայացուցիչ Մարիա Զախարովան հայտարարեց, որ Մոսկվան նպատակ ունի լայն աջակցություն ցուցաբերելու ՀԱՊԿ նոր գլխավոր քարտուղարին։
Իմանգալի Տասմագամբետովը ծնվել է 1956-ի դեկտեմբերի 9-ին Ղազախստանում։ Նա տարիների ընթացքում զբաղեցրել է երկրի պետքարտուղարի, վարչապետի, պաշտպանության նախարարի, Ղազախստանի նախագահի աշխատակազմի ղեկավարի պաշտոնները։ 2017-2019 թվականներին եղել է Ռուսաստանում Ղազախստանի դեսպանը։ Փիլիսոփայական գիտությունների թեկնածու է, քաղաքական գիտությունների դոկտոր։
ՀԱՊԿ-ի կազմում են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը։