Ծանրամարտի միջազգային ֆեդերացիայի նախագահ Մուհամեդ Ջալուդը հայտնել է, որ ծանրորդներն այլեւս չեն կարողանա մրցանակաբաշխության ժամանակ ներկայանալ իրենց երկրի դրոշով։ Նա նշել է, որ նման որոշում ընդունելուն են դրդել անցյալ ամիս Երեւանում անցկացված Եվրոպայի առաջնության բացման արարողության ժամանակ, ինչպես նաեւ անցյալ տարի Ալբանիայում տեղի ունեցած միջադեպերը։ «Մենք ներկայացնում ենք սպորտը, որը քարոզում է խաղաղություն, այլ ոչ թե պայքարում ենք պարզելու, թե որ ազգն է լավագույնը»,- ասել է միջազգային ֆեդերացիայի նախագահը Ասիայի ծանրամարտի ֆեդերացիայի կոնգրեսի ժամանակ:
2022-ին Ալբանիայում անցկացված Եվրոպայի պատանեկան առաջնությունում թուրք մարզիկն անհարգալից վերաբերմունք էր ցուցաբերել հայ ոսկե մեդալակրի նկատմամբ՝ Թուրքիայի դրոշով ծածկելով հաղթող երկրի դրոշը։ Բացի դրանից՝ Հայաստանի օրհներգի ժամանակ թուրք մարզիկը լքել էր պատվո պատվանդանը։ Երեք շաբաթ առաջ Երեւանում անցկացված Եվրոպայի առաջնությունում բացարձակապես արգելվել էր մարզիկներին դրոշներով ներկայանալ մրցանակաբաշխությանը, սակայն բացման արարողության ժամանակ այրել են Ադրբեջանի դրոշը։