Ըստ Washington Post պարբերականի` ռուս-ուկրաինական պատերազմի սկզբից ի վեր Միացյալ Նահանգները Կիեւին տրամադրել է ավելի քան 66 միլիարդ դոլար ընդհանուր օգնություն, ինչն, ըստ փորձագետների, հսկայական ներդրում է ԱՄՆ դաշնակցի տնտեսության մեջ: Ըստ պարբերականի՝ Երկրորդ համաշխարհային պատերազմից ի վեր ԱՄՆ-ը որեւէ այլ երկրի նման ծավալի օգնություն չի տրամադրել։
Կիեւին որպես ռազմական օգնություն հատկացվել է ընդհանուր գումարի 65%-ը՝ ավելի քան 43 միլիարդ դոլար։ Վաշինգտոնը 23,5 միլիարդ դոլար է տրամադրել ուղղակիորեն զենքի եւ սարքավորումների համար, 18 միլիարդ դոլար՝ ուսուցման, խորհրդատվության, լոգիստիկայի, նյութատեխնիկական ապահովման եւ սարքավորումների, 1,5 միլիարդ դոլար էլ՝ դրամաշնորհների եւ վարկերի համար՝ այլ երկրներից զենք եւ զինտեխնիկա գնելու նպատակով:
Եվս 20,5 միլիարդ դոլար Միացյալ Նահանգները հատկացրել է Ուկրաինայի բյուջեին աջակցելու, իսկ ավելի քան 2,6 միլիարդ դոլար՝ տեղահանվածներին, փախստականներին եւ բնակչության այլ խոցելի խավերին երկրի եւ նրա սահմաններից դուրս աջակցելու նպատակով:
Ուկրաինային հատկացված 66 միլիարդ դոլարը զգալիորեն գերազանցում է ԱՄՆ-ի այլ դաշնակիցների երկկողմ աջակցությունը. ԱՄՆ-ը իրենից ամենամեծ օգնության ստացողներին՝ Իսրայելին, Հորդանանին եւ Եգիպտոսին, ընդհանուր հատկացրել է շուրջ 14,8 , Իսրայելին՝ 8,6 , Հորդանանին՝ 3,3 եւ Եգիպտոսին՝ 2,9 միլիարդ դոլար օգնություն: