Հայաստանի պաշտպանության նախարարության վարչական համալիրում ՀՀ ՊՆ պաշտպանական քաղաքականության եւ միջազգային համագործակցության վարչության պետ Լեւոն Այվազյանի եւ Իտալիայի ԶՈՒ ԳՇ միջազգային համագործակցության վարչության պետ, գնդապետ Մատտիա Զուզզիի գլխավորությամբ դեկտեմբերի 12-ին անցկացվել են Հայաստան-Իտալիա պաշտպանական հերթական խորհրդակցությունները։
Հայաստանի պաշտպանական գերատեսչության փոխանցմամբ՝ խորհրդակցությունների ընթացքում քննարկվել են 2024 թվականին համագործակցության ուղղությամբ կատարված աշխատանքները, եւ պլանավորվել են հաջորդ տարվա անելիքները։
Հաղորդվում է, որ կողմերն իրենց գոհունակությունն են հայտնել համագործակցության ընթացքի վերաբերյալ, որը վերջին տարիներին ընդլայնվում է՝ ընդգրկելով նորանոր ոլորտներ։
Այվազյանը գործընկերներին ներկայացրել է բանակի կերպափոխման ուղղությամբ իրականացվող աշխատանքների ընթացքը։ Կարծիքներ են փոխանակվել նաեւ տարածաշրջանային եւ միջազգային մի շարք հարցերի շուրջ։
Խորհրդակցությունների արդյունքում ստորագրվել է Հայաստան-Իտալիա պաշտպանական համագործակցության 2025 թվականի ծրագիրը, որն ընդգրկում է մի շարք միջոցառումներ փորձի փոխանակման, տարբեր ուղղություններով պատրաստության, ռազմական կրթության եւ այլ ոլորտներում։