Հաջորդ շաբաթ նախատեսվում է Ուկրաինայի եւ ԱՄՆ-ի պատվիրակությունների հանդիպումը։ Այդ մասին հայտնել է Ուկրաինայի նախագահ Վլադիմիր Զելենսկին X-ի իր էջում հրապարակած գրառմամբ։
«Ուկրաինական եւ ամերիկյան թիմերը վերսկսել են աշխատանքը, եւ մենք հույս ունենք, որ հաջորդ շաբաթ կունենանք բովանդակալից հանդիպում»,- ասվում է Զելենսկու գրառման մեջ։
I am grateful for all the support, and Ukrainians really appreciate that in a time of such great emotions in global politics, European integrity is preserved and Europe is truly trying to do the right thing. Meanwhile, Ukrainian and American teams have resumed work, and we hope…
— Volodymyr Zelenskyy / Володимир Зеленський (@ZelenskyyUa) March 6, 2025
Fox News-ի լրագրող Ջեքի Հայնրիխի տեղեկություններով՝ բանակցությունները կմեկնարկեն երեքշաբթի՝ մարտի 11-ին, Սաուդյան Արաբիայի մայրաքաղաք Ռիադում։
Նրա խոսքերով՝ ԱՄՆ-ից հանդիպմանը կմասնակցեն պետքարտուղար Մարկո Ռուբիոն, ԱՄՆ նախագահի ազգային անվտանգության հարցերով խորհրդական Մայք Ուոլցը եւ Դոնալդ Թրամփի հատուկ դեսպանորդ Սթիվ Ուիթքոֆը։ Ուկրաինայի կողմից բանակցություններին կմասնակցի նախագահի գրասենյակի ղեկավար Անդրեյ Երմակը։
Օրեր առաջ Մայք Ուոլցը հայտարարեց, որ Վաշինգտոնի եւ Կիեւի ներկայացուցիչները քննարկում են պատերազմի դադարեցման բանակցությունների ամսաթիվը, վայրը եւ մասնակիցներին։
Ուկրաինայի նախագահի գրասենյակի ղեկավար Անդրեյ Երմակը հայտնել է, որ հեռախոսազրույց է ունեցել Ուոլցի հետ։
«Քննարկեցինք արդար եւ երկարատեւ խաղաղության ճանապարհին հետագա քայլերը։ Նաեւ մտքեր փոխանակեցինք անվտանգության հարցերի շուրջ եւ համաձայնեցրինք դիրքորոշումները Ուկրաինա–ԱՄՆ երկկողմ հարաբերությունների շրջանակում։ Պայմանավորվեցինք մոտ ապագայում մեր թիմերի հանդիպման մասին՝ այս կարեւոր աշխատանքը շարունակելու համար»,- նշել էր Երմակը։