ՄԱԿ-ում ՌԴ մշտական ներկայացուցչի առաջին տեղակալ Դմիտրի Պոլյանսկին հայտնել է, որ ՄԱԿ-ի Անվտանգության խորհրդի հայտարարությունը Ֆրանսիայի մոտեցման պատճառով Լաչինի միջանցքի շուրջ ստեղծված իրավիճակի վերաբերյալ չի ընդունվել։ «Չեմ կարող չնշել Լաչինի միջանցքի շուրջ ստեղծված իրավիճակի վերաբերյալ ՄԱԿ-ի Անվտանգության խորհրդի կողմից մամուլի համար հայտարարություն չընդունելու պատճառների մասին տեղեկատվության բացարձակ կեղծ ներկայացումը»,- իր տելեգրամյան գրառման մեջ նշել է Պոլյանսկին:
Ըստ նրա՝ ՌԴ մշտական ներկայացուցչությունը ԱԽ-ի արձագանքի մշակման համատեքստում ամենասկզբից տրամադրված է եղել կառուցողական աշխատանքի։ Երեւանի խնդրանքով այդ գործընթացը համակարգել են ֆրանսիացիները, որոնք անտեսել են մեր առաջարկների ճնշող մեծամասնությունը՝ հաշվի առնելով ԱԽ մյուս անդամների խմբագրումները։ «Փարիզի նման հնարքների կեղծությունն ակնհայտ է։ Եվ սա այն դեպքում, երբ մենք, ի տարբերություն արեւմտյան երկրների, ոչ թե խոսքով, այլ գործով զբաղվում ենք Լեռնային Ղարաբաղի հակամարտության կարգավորմամբ, ներառյալ՝ Լաչինի միջանցքի խնդրով»,-ընդգծել է դիվանագետը:
Պոլյանսկին նշել է, որ ՌԴ խաղաղապահներն ապահովում են անվտանգությունը եւ կողմերի հետ շփումներում վիճելի հարցերի հանգուցալուծում են փնտրում։ «Անկախ ներկայիս սրացումից, կարգավորման հիմք են մնում բարձր մակարդակի չորս համատեղ հայտարարությունները, որոնք հավանության են արժանացրել ե՛ւ Բաքուն, ե՛ւ Երեւանը։ Հայտարարության վրա աշխատելու ընթացքում մեր նախկին արեւմտյան գործընկերները քաջություն չգտան հիշատակել այդ փաստաթղթերը եւ ՌԴ խաղաղապահների ջանքերը»,- նշել է Պոլյանսկին։
Ավելի վաղ Փաշինյանը Մոսկվային կոչ էր արել ՄԱԿ-ի Անվտանգության խորհրդում քննարկում նախաձեռնել ԼՂ-ում Լաչինի միջանցքի շրջափակման պատճառով ստեղծված իրավիճակի վերաբերյալ ու տրանսպորտային երթեւեկության վերականգնման ճանապարհային քարտեզ ներկայացնել: Նա նշել էր, որ Լաչինի միջանցքի արգելափակումը Հայաստանի, Ռուսաստանի եւ Ադրբեջանի նախագահների 2020 թվականի նոյեմբերի 9-ի եռակողմ հայտարարության վեցերորդ կետի խախտում է։