Բարեգործական համերգներով ու վարպետաց դասերով կրկին Հայաստանում էր ամերիկահայ դաշնակահար Շահան Արծրունին։ Մոտ մեկ ամիս տեւած համերգային շրջագայությունը նա սկսել է Թբիլիսիից եւ շարունակել Հայաստանի Արմավիր, Վայք, Եղեգնաձոր, Գավառ, Աբովյան, Չարենցավան, Հրազդան, Թալին եւ Ապարան քաղաքներում։
«Երաժշտության հմայքը» խորագրի ներքո դաշնակահարը ոչ միայն ելույթներ է ունենում արվեստասեր հանրության համար, այլեւ իր բազմամյա փորձն է փոխանցում երաժշտական դպրոցներում սովորող երեխաներին։
«Երբ ես կնվագեմ, աշակերտները առիթը կունենան լսելու, թե ինչ ձեւով կարելի է դաշնամուրը գործածել եւ այդ երաժշտությունը ներկայացնել ժողովրդին։ Իմ նպատակը դա է՝ գնալ քաղաքներ, ուր կկարողանամ տղոց հետ հարաբերություն մը ստեղծել եւ իրենց փոխանցել իմ իմացածը։ Ես էլ իրենցմէ կսովորեմ», — «Ալիք Մեդիա»-ի հետ զրույցում ասաց Շահան Արծրունին։
Դաշնակահարն իր համերգային ամենամյա շրջագայությունները սկսել է 2017-ից։ Հայ եւ արտասահմանցի կոմպոզիտորների ստեղծագործությունները Արծրունու կատարմամբ Հայաստանի եւ Վրաստանի մարզերում ու համայնքներում հնչում են ՀՕՖ-ի աջակցության շնորհիվ։
Մոտ տասը տարի այս ծրագրով Հայաստան այցելող արվեստագետը նկատում է՝ յուրաքանչյուր համայնքում երաժշտական կրթության պատկերը տարբեր է՝ կախված համայնքի մեծության եւ անգամ այն հանգամանքից, թե որտեղ են կրթվել երեխաներին դասավանդող ուսուցիչները՝ Երեւանո՞ւմ, Մոսկվայո՞ւմ, թե՞ Եվրոպայում։
Բայց, ըստ դաշնակահարի, սա մեծ խնդիր չէ, որովհետեւ «արվեստի հանդեպ, եթե որոշ մշակում ըլլա, այն ատեն քու հոգեկան եւ մտային մակարդակդ կբարձրանա»։ Հիմնական խնդիրը դպրոցներում երաժշտական գործիքների պակասն է, դրանց անխնամ վիճակը եւ անսարքությունը։
«Ես ատոր համար շատ կզարմանամ, կըսեն, որ լարողներ, նորոգողներ չիկան, եւ իբր թե կառավարությունը խոստացած է 300 դաշնամուր նվիրել երաժշտական դպրոցներուն եւ ուսումնարաններուն։ Ես իրապես պիտի խնդրեի Հայաստանի կառավարությանը, որպեսզի այդ 300 դաշնամուրները շուտ հասնին դպրոցներ։ Եթե նույնիսկ ես երբեմն դժվարություն ունիմ այդպիսի դաշնամուրներին «խոսեցնելու», հասկանալի է, որ երեխաները երբեք չեն կարողանա»,- իր մտահոգությունն է հայտնում Շահան Արծրունին։
«Երաժշտության հմայքը» խորագրով համերգային շրջագայության ընթացքում երաժշտական դպրոցներում անցկացված վարպետության դասերից հետո սովորողներից մի քանիսը հնարավորություն են ստանում նույն բեմում նվագելու Շահան Արծրունու հետ։
Մասնագիտությամբ լրագրող եմ։ 15-ամյա աշխատանքային գործունեությանս մեծ մասն անցել է հեռուստատեսության ոլորտում՝ Ալավերդու «Անկյուն+3» հեռուստաընկերությունում։