Հայաստանի անկախության օրվան ընդառաջ Ազգային պատկերասրահի Ալավերդու մասնաճյուղում ցուցահանդես է բացվել։ Մոտ մեկ ամիս այցելուները հնարավորություն կունենան ծանոթանալու գեղանկարիչներ Սուրեն Սաֆարյանի, Վահագն Գալստյանի, Վլադիմիր Սիմոնյանի, Սուրեն Ամիրյանի եւ Ռաֆայել Ջավախյանի ստեղծագործություններին։
Ալավերդու պատկերասրահի տնօրեն Ռաֆայել Ջավախյանը դեռ նախորդ տարի էր պլանավորել նման ցուցադրություն կազմակերպել, բայց համավարակի պատճառով հետաձգվել էր։ Նրա այս նախաձեռնությանն աջակցել է Հայաստանի նկարիչների միությունը։
«Նկարիչների միությունը շատ է կարեւորում մարզային մշակութային քաղաքականությունը, եւ սա մի քայլ է, որ մենք կարողանանք աշխուժացնել, վարակել մարզերում ապրող մարդկանց, մոտեցնենք նրանց մշակույթին»,- ցուցահանդեսի բացմանն իր խոսքում նշեց Հայաստանի նկարիչների միության նախագահ Սուրեն Սաֆարյանն ու ավելացրեց՝ Ալավերդիում կան մշակույթի զարգացման բոլոր նախադրյալները, ուղղակի պետք մարդիկ համախմբվեն ու նման նախաձեռնություններ իրականացնեն։
Գեղանկարիչ Սուրեն Ամիրյանը Լոռիում անցկացվող մշակութային տարբեր նախաձեռնությունների է մասնակցել, մասնավորապես «Համագործակցության եւ բարեկամության ներկապնակ» միջազգային փառատոնին, որը համախմբում է հայ եւ օտարազգի նկարիչների։
Մարզերում անցկացվող նման սիմպոզիումներն, ըստ գեղանկարչի, հայրենաճանաչության լավ առիթ են, նաեւ օտարների կողմից մեր երկիրը դրսում ներկայացնելու հրաշալի հնարավորություն։
«Հիմա երկիրը գտնվում է էնպիսի վիճակում, որ արվեստը հետին պլան է մղվել։ Հատկապես մարզերում մի քիչ բարձիթողի վիճակ է։ Բայց ամեն անգամ Ալավերդիում ինչ-որ միջոցառման մասնակցելը մեծ հաճույք ու պատիվ է յուրաքանչյուր արվեստագետի համար։ Եվ տա Աստված, որ հիմք դրվի մի նոր մշակութային պատմության հենց Լոռիից»,- ասում է Սուրեն Ամիրյանը։
Պատկերասրահի տնօրենի խոսքով՝ շուտով Ալավերդիում կբացվի եւս մեկ ցուցահանդես, որը կներկայացնի Հայաստանի մշակութային ժառանգությունը։
Մասնագիտությամբ լրագրող եմ։ 15-ամյա աշխատանքային գործունեությանս մեծ մասն անցել է հեռուստատեսության ոլորտում՝ Ալավերդու «Անկյուն+3» հեռուստաընկերությունում։