ՀՀ ՊՆ մամուլի ծառայությունից հայտնել են, որ ՌԴ Մուլինո զորավարժարանում տեղի է ունեցել «Արեւմուտք 2021» ռազմավարական զորավարժության բացման հանդիսավոր արարողությունը: Վրանային ավանի շարահրապարակում բարձրացվել են մասնակից պետությունների ու զորավարժության դրոշները: «Արեւմուտք 2021»-ին մասնակցելու համար Հայաստանի զորախումբը ՌԴ էր մեկնել սեպտեմբերի 4–ին:
ՌԴ պաշտպանության փոխնախարար Նիկոլայ Պանկովը նշել է, որ համատեղ զորավարժությունները հնարավորություն կընձեռեն մշակելու զորքերի պատրաստության համընդհանուր մոտեցումներ, կամրապնդեն ընկերությունն ու կձեւավորեն մարտական եղբայրության նոր համատեղ ավանդույթներ: Բանակի գեներալը նաեւ շեշտել է, որ «Արեւմուտք 2021» զորավարժությունները միմիայն պաշտպանողական բնույթի են:
«Արեւմուտք 2021»-ին մասնակցում են Ռուսաստանի, Հայաստանի, Բելառուսի, Հնդկաստանի, Ղազախստանի, Ղըրղզստանի, Մոնղոլիայի զորախմբերը: ՌԴ եւ Բելառուսի տարածքում ընթացող զորավարժություններին ներգրավված են շուրջ 200 հազար զինծառայող, մոտ 80 ինքնաթիռ եւ ուղղաթիռ, մինչեւ 760 միավոր տարբեր տիպի զրահատեխնիկա, հրթիռային համակարգեր ու հրետանային միջոցներ, ինչպես նաեւ 15 նավ: Զորավարժության հիմնական գործողությունները տեղի կունենան սեպտեմբերի 10-16-ը: