ՀՀ ՊՆ-ից հայտնել են, որ սեպտեմբերի 9-ին ՀՀ պաշտպանության նախարար Արշակ Կարապետյանը ՊՆ վարչական համալիրում հանդիպել է 44-օրյա պատերազմում անհայտ կորած զինծառայողների ու կամավորների ծնողներին եւ հարազատներին։
Պաշտպանության նախարարը լսել է նրանց մտահոգություններն ու առաջարկները եւ պատասխանել հարցերին: Նա հայտնել է, որ որոնողական աշխատանքները շարունակվում են, ընդ որում՝ հաշվի առնելով նաեւ ծնողների ունեցած տեղեկությունները։
Արշակ Կարապետյանը հավաստիացրել է, որ գործադրվում են բոլոր ջանքերը՝ անհայտ կորած յուրաքանչյուր զինծառայողի ճակատագիրը բացահայտելու ուղղությամբ։
Հանդիպման ընթացքում հարազատների կողմից բարձրացված հարցերի շուրջ պաշտպանության նախարարը խնդրով զբաղվող համապատասխան հանձնաժողովի նախագահ, գեներալ-մայոր Արթուր Սիմոնյանին հանձնարարել է ուսումնասիրել եւ զեկուցել մանրամասները։
Արշակ Կարապետյանն ընդգծել է, որ նմանատիպ հանդիպումները պարբերական կլինեն եւ վստահեցրել, որ խնդիրն իր անմիջական ուշադրության կենտրոնում է։