Եվրամիությունը հայտարարություն է տարածել նոյեմբերի 9-ի հրադադարի մեկ տարվա կապակցությամբ՝ ընդգծելով, որ թեեւ Ղարաբաղյան վերջին պատերազմը դադարել է, սակայն հակամարտությանն առնչվող բազմաթիվ հարցեր դեռ պետք է լուծվեն` բանակցություններով առաջ շարժվելու համար դեպի համապարփակ ու կայուն կարգավորում։
Բրյուսելը կողմերին կոչ է արել խստորեն հարգելու հրադադարը, անհապաղ ազատ արձակելու բոլոր ձերբակալվածներին, լիակատար համագործակցություն ծավալելու ականազերծման եւ սահմանային շրջաններում լարվածությունը թուլացնելու ուղղությամբ:
Ընդգծելով, որ Եվրամիությունը շարունակում է մնալ հավատարիմ խաղաղ ու բարգավաճ Հարավային Կովկասի առաջխաղացմանը՝ ԵՄ արտգործնախարարի խոսնակ Պիտեր Ստանոն հիշեցրել է, որ Բրյուսելը կարեւոր դեր է խաղացել ձերբակալվածների ազատ արձակման եւ ականների քարտեզների փոխանակման հարցում: «Եվրամիությունը նաեւ աջակցել է հակամարտությունից տուժած մարդկանց` ավելի քան 17 միլիոն եվրո տրամադրելով մարդասիրական նպատակների համար, դդրանց թվում` ականազերծման եւ վերականգնման»,- ասված է հայտարարությունում:
Եվրամիության արտգործնախարարի խոսնակը կրկնել է` Միությունը պատրաստ է նաեւ աջակցելու կողմերին սահմանային լարվածության թուլացման եւ դելիմիտացիայի հարցերում` տրամադրելով տեխնիկական աջակցություն, եթե կողմերը դրա կարիքը կունենան: Բացի դրանից՝ Բրյուսելը նաեւ քաջալերել է կողմերին՝ վերաբացելու տնտեսական համագործակցությունը Հարավային Կովկասում:
«Ավելի քան 30 տարի շարունակվող հակամարտությանն ու տառապանքին վերջ տալու համար անհրաժեշտ է համապարփակ կարգավորում: Այդ նպատակին հասնելու համար Եվրամիությունը կշարունակի ակտիվ կապի մեջ լինել միջազգային դաշնակիցների, մասնավորապես ԵԱՀԿ Մինսկի խմբի համանախագահների հետ, եւ լիովին աջակցում է նրանց մանդատին` Հայաստանի եւ Ադրբեջանի միջեւ դեռեւս չլուծված խնդիրների համապարփակ լուծումը գտնելու համար»,- հայտարարել է ԵՄ արտաքին քաղաքականության բարձր ներկայացուցիչ Ջոզեպ Բորելի խոսնակ Պիտեր Ստանոն: