Ուկրաինական պատվիրակությունը ուղղաթիռներով ժամանել է Ռուսաստանի հետ բանակցությունների վայր Բելառուսի Բրեստի շրջանում։
ՌԴ նախագահի օգնական Վլադիմիր Մեդինսկին հայտնել էր, որ Ուկրաինայի հետ բանակցություններում ռուսական առաջարկները բաղկացած են 3 մասից՝ ռազմատեխնիկական, հումանիտար-միջազգային եւ քաղաքական:
Իսկ Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտնել էր մարտի 2-ի երեկոյան Ռուսաստանի հետ բանակցությունների մասին: Սկզբում նշվում էր Բելովեժյան թավուտում հանդիպման մասին, սակայն ուկրաինական կողմը չի համաձայնել տեղի սիմվոլիզմի պատճառով. 1991-ին հենց այնտեղ է ստորագրվել Անկախ պետությունների համագործակցության ստեղծման մասին համաձայնագիրը Ռուսաստանի, Ուկրաինայի եւ Բելառուսի ղեկավարների միջեւ։
Կրեմլի պաշտոնական ներկայացուցիչ Դմիտրի Պեսկովը հայտարարել է, որ որեւէ կանխատեսում չի արել բանակցությունների հնարավոր ելքի վերաբերյալ։
Կախված է Եվրոպայի քաղաքական կամքից
Ուկրաինայի արտգործնախարար Դմիտրո Կուլեբան մարտի 3-ին ավելի վաղ հայտարարել էր, որ Ուկրաինան պատրաստ է Ռուսաստանի հետ խաղաղ բանակցություններին եւ պատրաստակամ՝ դիվանագիտական ջանքեր գործադրելու:
Կուլեբան հույս է հայտնել, որ Ռուսաստանի հետ բանակցությունների ընթացքում հնարավոր կլինի ստեղծված իրավիճակին դիվանագիտական լուծում գտնել:
Անդրադառնալով Եվրամիությանը Ուկրաինայի անդամակցության մասին՝ Կուլեբան նշել է, որ կառույցին անվերապահ անդամակցություն չի լինի, բայց Կիեւը ձգտում է արագ լուծելու հատուկ ընթացակարգով կառույցին միանալու հարցը:
Ուկրաինայի արտգործնախարարը շեշտել է, որ այս փուլում ամեն ինչ կախված է Եվրոպայի քաղաքական կամքից: